Концерт страдальных пісен в Святковій Великій

Заран, т.є. 29. марця 2015 рока, в лемківскым селі Святкова Велика, в лемківскій церкви, о 16.00 год. зачне ся Концерт польскых і лемківскых страдальных пісен. Выступит лемківска співачка Юлия Дошна та Антоний Пільх. Концерт буде получений з великоднім ярмаком.

В остатнім часі лемківска артистка часто концертує разом з лютнистом Антонийом Пільхом, з котрым презентує давны пісні з польско-украіньско-лемківского погранича, зобраны выдатныма фольклористами.

Юлия Дошна – лемківска співачка родом з Білянкы, долголітня солістка ансамблю Лемковина, обдарувана теплым, пренимаючым і вынятковым голосом, знаным і любленым уж не лем на Лемковині; концертує по цілій Польщы та поза єй границями, успішні розславляючы музычну спадковину Русинів.