Концерт Серенчы не лем для біциґлистів

В вакацийно-літнім періоді неє такого вікенду, жебы дашто не діяло ся на Лемковині, або жебы даде інде в світі не была презентувана русиньска культура. Оферта єст барз шырока – од концертів, фестинів, варштатів, кєрмешів, выстав, по такы ініциятивы, котры дакус більше активуют публику і пропаґуют здоровий спосіб жытя.

Єдном з такых пропозиций в найблизшым часі єст Ретро Райд Біциґлистів, орґанізуваний в рамках Цикличных Стріч з Культуром Лемків і Погірян. Райд буде проходил в неділю 17. липця/юлия т.р. на обшыри Лемковины з закінчыньом на «Пристанку Шымбарк» при ренесансовым каштели в Шымбарку. Закінчыньом райду буде выбір найліпшого ретро-роверу і ретро-облечыня.

Сам райд буде проходил аж на трьох трасах:

• траса ретро – переізд з Ґорлиц до Шымбарку зо звиджаньом церкви;
• траса гірска – з Ґорлиц через Рыхвалд, Маластів, Прислоп, Маґуру, Білянку, Шымбарк, Быстру, Масляну Гору і Ґорлицкє Морскє Око до «Пристанку Шымбарк»;
• траса шосова – з Ґорлиц через Сяры, Ґладышів, Реґєтів, Высову, Устя, Кункову, Білянку до до «Пристанку Шымбарк».

На закінчыня переіздів плянуваний єст концерт лемківского фолькового ансамблю Серенча та коротка прелекция Кристины Райнфус-Януш, етноґрафкы з Етноґрафічного Музею в Кракові на тему тереновых досліджынь проф. Р. Райнфуса на ровері.

Орґанізатором стрічы єст Музей Дворы Карвациянів і Ґладышів в Ґорлицях одділ Скансен Погіряньского Села в Шымбарку та Стоваришыня Промоциі Лемківской Творчости «Серенча».