Концерт лемківскых і польскых різдвяных пісен в Ґорлицях

Товариство Приятелів Музикы і хор Cantores Carvatiani просят на концерт лемківскых і польскых коляд і різдвяных пісен. Концерт зачне ся о 17.00 год. в неділю, 8. грудня/децембра, в авли Комплексу Державных Музичных Шкіл в Ґорлицях.

Ґорлицкій концерт є звінчыньом задачы пн. Різдвяный проєкт хоральной музикы – Просфора 2019. «Навязує він до самого смыслу колядуваня, котрым была колиси обрядова выміня дарунків та діліня ся хлібом вчас Велиі» – бесідує Анна Цісонь, координаторка проєкту, заєдно дириґентка хору Cantores Carvatiani.

«Наш проєкт єст запрошыньом до стірчы, радости діліня ся і выміны досвідчынь в обшыри хоральной музикы» – оповідат А. Цісонь. В рамках задачы ансамблі будут шліфувати своє співоче знаня на варштатах під оком двох специялисток: Луциі Берешовой, дириґенткы зо Словациі, котра днес робит і прожыват в Барцелоні, та Юлиі Дошны, пропаґаторкы лемківской музикы. «Юлия Дошна то знана лемківска піснярка, котра од років промує знаня про культуру Лемків серед польской соспільности» – дополнює А. Цісонь.

На недільным концерті запрезентуют ся: дітячый хор Комплексу Державных Музичных Шкіл в Ґорлицях Аколяда, мішаный хор Зоря, Юлия Дошна та хор Cantores Carvatiani. Хорами дириґувати будут Анна Дильонґ, Анна Цісонь та гостинні Луция Берешова.

В рамках проєкту хор Cantores Carvatiani зрыхтувал і записал на платни коляды, щедрівкы і інчы різдвяны пісні. Част з них буде запрезентувана публиці на концерті.