Концерт Ансамблю “Кычера” в Будзішові Малым

В неділю, 7. червця т.р., в селі Будзішів Малий на Нижнім Шлеску, буде проходил IV Фестіваль Народной Творчости. Свій выступ, як і в попередніх едициях, даст Лемківскій Ансамбль Пісні і Танця “Кычера”. Як доносят голосы з кулюарів, “Кычера” має быти звіздом вечера. Свій 45-минутовий выступ ансамбль розпочне о 20.00 год. Влони, по концертовій части, члены “Кычеры” брали присутных з пибликы і спільні гуляли, медже інчыма лемківского вальчыка, ци стародавну польку.

Кєд мате змогу, заохочаме зайти до Будзішова Малого і обізрити лемківскій фольклор!

Лемківскій Ансамбль Пісні і Танця „Кычера” был оснований Юрийом Стариньскым в 1991 році. Члены ансамблю то молодіж головні з Нижнього Шлеска. Кычера то єдиний ансамбль посеред тых, котры репрезентуют етнічны меншыны в Польщы, якій през долгы рокы был членом CIOFF. В рамках презентуваного ансамбльом проґраму находят ся танці і співанкы з цілой обшыри Лемковины, Пряшівской Руси і Підкарпатской Руси. В репертуарі “Кычеры” мож найти стилізуваны лемківскы танці і обряды. Великій труд вложений в опрацуваня репертуару і высокій рівен реалізуваных “Кычером” задач потверджают чысленны нагороды, якыма ансамбль был гоноруваний на просторі вшыткых років свойой діяльности.