Конституцийний Суд Украіны засідал в справі закону о языковій політиці

Констутицийний Суд Украіны – єдиний орґан конституцийной юрисдикциі в тій державі, в четвер 17. листопада/новембра 2016 р., на своім засіданю занимал ся внеском депутатів Всеукраіньского Обєднаня «Свобода» о провіріня конституцийности Уставы о принципах державной языковой політикы, знаной тіж як «Закон Колесниченка-Ківалова». То закон, в котрым бодай перший раз в істориі украіньского законодавства явил ся русиньскій язык, вычыслений посеред 18 другых реґіональных языків. О тій уставі писали сме уж шырше на портали lem.fm і в 35. чыслі Панрусиньского тыжденника ЛЕМ.фм+.

На піл годины до судового засіданя перед його кыівском сідибом зачала ся пікєта сторонників вызнаня уставы о языковій політиці Украіны незгідном з конституцийом. На ул. Жыляньскій 14 в Кыйові зобрало ся ок 100 осіб, в тым представникы соспільных орґанізаций, політичной партиі «Свобода» і другы заінтересуваны. Як чытаме на фейбуковым сайті Свободы, зо стороны протестуючых ішли опініі (тота – од Олега Тягнибока з ВО «Свобода»), же такій вид Уставы о принципах державной языковой політикы єст «пляном Путіна зробити росийскій другым [попри украіньскым – прип. Д.Т.] державным языком, зато они обдумали таку собі псевдотолеранцию, котром примушают нас погодити ся з русифікацийом Украіны.»

Од 9.00 год. (10.00 за локальным часом) Констутицийний Суд Украіны зачал процедуру устного выслуханя внескодавців. Хоц на засіданю не зъявил ся представник президента Украіны, КСУ рішыл зачати розправу без його присутности. Початок засіданя проходил на фоні формально-правных вопросів, котры піднял Олег Боднарчук. Як єден з представників внескодавців, заявил він одсунути од процедуваня 5 судів (на сали присутных было троє), арґументуючы свою заяву іх участю при змінах конституциі в 2010 р., котра вводила новы принципы выборчой ординациі і могучо розшырювала діапазон компетенций президента Украіны (товды был ним Віктор Янукович), што подля Боднарчука мало быти явном підпором «режіму Януковича». По короткым выслуханю такой арґументациі, члены КСУ пішли нарадити ся в тій справі. По взновліню засіданя не приняли можности выключыня з розправы спомненых судів, зато зачала ся дальша част засіданя.

По перерві ініцияторы складали офіцияльны внескы о долучыня до судовой розправы документів і другых доказів, будучых подля них помічныма в зрозумліню причын, за котрыма вносили розсмотріти згідніст Уставы о принципах державной языковой політикы з конституицийом Украіны. Внескодавці бесідували о нарушеных процедурах, подля котрых был схвалений закон, пропонували покликати свідків (м.ін. бывшого премєра Украіны А. Яценюка, актуального предсідателя Верховной Рады Украіны А. Парубія, бывшых і актуальных депутатів і другых, котры брали участ в принятю закону) та експертів. Пропонували тіж залучыти стеноґрамы і відеозаписы з засідань Верховной Рады і інчы документы. По короткій нараді, ведучий розправу судя, будучы согласным з внескуваныма постулятами, рішыл долучыти рекомендуваны документы і доказы та включыти до розправы експертів, специялистів і свідків. З орґанізацийных причын (потреба позваня свідків і експертів) та через необхідніст запознати ся документацийом, ведучий судя запер тырваюче ок. 3 годины засіданя, заявляючы, же о терміні наступного засіданя внескодавці будут повідомлены в пізнійшым часі.

Фото горі: Конституцийний Суд Украіны, джерело: Wikimedia.org/Dezidor/CC BY-SA 3.0