Конкурс о нагороду ім. проф. Б. Кумора – наступна книжка о лемківскій тематыці

Тырват четверта едиция конкурсу о нагороду ім. проф. Болеслава Кумора. Цілю конкурсу, орґанізуваного Сандецком Фундацийом, є выбраня лавреатів нагороды в двох катеґориях: книжка о Сандеччыні і сандецкій автор. Конкурс тыкат ся позиций печатаных в 2015 році та доробку місцевых авторів. Болеслав Кумор (1925-2002) то римокатолицкій священник, істoрик, професор теолоґічных наук.

Серед книжковых позиций, котры берут участ в тогорічній едициі конкурсу, находит ся позиция звязана з лемківском сакральном штуком. То альбом пн. Zabytkowe świątynie na szlaku architektury drewnianej w regionie Krynicy-Zdroju. Книжка была печатана Товариством Розповсяджаня Традициі і Культуры Лемків з Крениці як публикация, приготовлена в рамках Проґраму Розвитку Сельскых Обшыри. В альбомі найти мож знимкы семох забытковых грекокатолицкых храмів, котры днес служат як римокатолицкы костелы. Автором фотоґрафій є Лемко – Миколай Ґрич, котрого знимкы представляют церкви в Солотвинах, Поворознику, Тыличы, Війкові, Щавнику, Злоцкым і Перунці. До каждого храму долучений єст опис і його істория та інформация о селі, в котрым стоіт.

Влони до конкурсу зголошенo 15 публикаций, котры были печатаны в 2014 році, а до катеґориі на найліпшого сандецкого автора – 10 осіб. На переможців жде піняжна нагорода 20 тис. зл. Позициі мож было зголошати до днес, 15. лютого/фебурара т.р., але выняткого можут быти они зголошены по тым часі, за згодом Капітулы. Дотеперішніма лавреатами нагороды ім. проф. Болеслава Кумора сут м.ін. Ванда Ломніцка-Дуляк і Антоні Крог. Більше про конкурс – чытайте в реґуляміні.

О інчій книжці, котра стартує в тогорічній едициі конкурсу (авторства Целіны Цемпы пн. Лабівскы Ескізы), пишеме за тым мотузком.