Конец туристичной колибы на Маґурі?

На высокости 740 метрів н.р.м., в самым серци Лемковины, на Маластівскій Маґурі находит ся туристична колиба, в якій каждий вандруючий путями Низкого Бескіду може найти схороніня на ніч, дістати теплу страву з непотворной діры, найти камарата, жебы си кус побесідувати, мож ся гын сховати, жебы пречекати бурю, задуявку, або просто оддыхнути перед дальшом вандрівком. Все тіж мож наново найти свою стежку. Місце тото неодолга заміст приносити хосен людям – може опорожніти, як іщы недавно ціла Лемковина.

Будинок туристичной колибы на Маґурі побудуваний был в 1955 році, але вымагат скорых ремонтів і коли не поведе ся провести необхіды роботы – колибі горозит запертя. Туристична колиба єст всласністю Польского Туристично-Крайознавчого Товариства, але інакше як інчы його будинкы, старат ся о ню місцевий Одділ ПТКТ в Ґорлицях, котрий не єст в силі фінансово двигнути конечны ремонтовы выдаткы.

Гриц Вацек, новичан з лемківскыма корінями, а од 8. років опікун колибы, зрыхтувал специяльний проєкт на сайті polakpotrafi.pl. То місце в віртуальным світі, де мож спільныма силами, через малы квоты, зобрати реальны грошы на даяку конкретну річ, в тым примірі – на ремонт. Опис цілого проєкту, враз з детальным поділом квот на конкретны роботы, мож найти на реченым сайті polakpotrafi.pl, а каждий з одвиджаючых може вплатити буд-яку квоту спосеред запропонуваных і тым самым остати частю ремонтовой екіпы. На каждого жертводавцю ждут дрібны дарункы, повязаны з маґурском колибом. Акция збераня гроші тырват лем окрислений час, пак, коли не поведе зобрати ся заплянуваной квоты, вплачены грошы треба буде звернути, а ремонт зас одвлече ся на долгій час…