Конец січня – «Говорить Пряшів» – пятниця, 20.00 год.

Ци до Вас уж пришли єґомость по коляді? Кєд гей – то тым ліпше, бо мате посвячены стіны Вашых хыж, а кєд радийо деси на верха вытягнене, на дакій поличці, та може і радийо парох посвятили. Не думайте си – і редакция мусит свяченой воды хлипнути, жебы здорова была, більше писала і мудрійше розповідала. 

Так нам як раз минули наступны свята. Як то скоро летит, то ани ся не обізриш. Нашым днешнім проґрамом пращаме такой січен/януар, бо о тыжден ся стрітиме уж в тым місяци, якій часто нас чудує. Товды то аж можут быти зимы. 

Лем не сідте за долго. Збыткувати треба чым скоро, понеже Великій Піст уж од 19. лютого/фебурара. То не дуже часу на забаву. Про гулянкы Вам ту не будеме правити, бо од того є наша чырчаньска редакция, але заправити добру атмосферу на потупайку то сме іщы годны. 

З поважных, культурных і правильных річы повіме Вам, што в днешнім «Говорить Пряшів» Ігор Латта прочытат вершы неякого Любомира Камяньского. Но, але ци каждий з Вас знат того чловека? Певно ніт. То лем псевдонім лемківского поеты Нестора Жылича. Його творчіст то предовшыткым патріотична лірика, на котру зобрало ся більше як 350 вершів, зобраных в двох рукописных збірках Карпатскы думкы і Карпатскы сміховинкы. Жылич написал тіж поему За Русь, волю і правду, оповіст з лемківского жытя Гайниця, нарис Никыфор Дровняк і вельо статий про німецку окупацию на Лемковині.

Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.