Кому тот асфальт?

Ґміна Крампна хоче положыти асфальт на єдній з доріг, яка веде через єдну з найкрасшых долин середньой Лемковины. Бесіда про пошыріня і выасфальтуваня дорогы в части, яка лучыт села Граб-Вышоватка-Долгє.

О кілько два першы з вычысленых сел сут заселены, о тілько село Долгє не істнує, од коли были з него выселены послідні автохтонны жытелі – Русины. Контроверсийна справа ожыла, коли на сайті Бюлетину Публичной Інформациі Ґміны Крампна явило ся офіцийне повідомліня про завершыня поступуваня в справі выданя рішынь о середовисковых обставинах для той ініциятивы. Проєкт має быти сфінансуваный з грошів походячых з Польского Ладу.

Ґміна хоче повекшыти – пошырити і выасфальтувати дорогы в єй части, яка находит ся в підкарпатскым воєвідстві. Як раз границя медже малопольскым а підкарпатскым воєвідствами є медже Долгым і Вышоватком. Прекрасна перегыба в своій великій части находит ся на обшыри ґміны Крампна і то она мала бы мати нову асфальтову дорогу.

Реґіон, про котрый бесіда, то част Лемковины, котра в великій мірі остає незамешкана, а через тото найбарже спокійна і натуральна. Через вельох уважана є за єдну з найкрасшых долин Низкого Бескіду. Окрем того, то як раз тот порожній реґіон прикликує найбільшы зворушыня серед выселеных і іх потомных. На примірі незрушеной природы і структуры терену, хоц бы села Долгє, мож прібувати уявити си давный хотар.

Війт ґміны Крампна Казімєж Міськович інфомує в опубликуваным документі, што неє конечности переводити оціну влияня той інвестициі на середовиско.

Подля осіб, якы занимают ся охороном природы, сеса част Лемковины то важный одтинок не лем для розвитку опертого на сучасній зрівноваженій туристиці, але і для захованя контакту Маґурского Нацийонального Парку з сусіднім тереном. Тым більше, што околиці перегыбы, до котрой має быти положеный асфальт, сут важным еколоґічным коридором, в будучности можливым до прилучыня до сіти обшыри Натура 2000. Видніє тіж як еколоґічный коридор в проєкті Пляну Охороны Маґурского Нацийонального Парку.

Для заінтересуваных документация, тыкаюча той контроверсийой справы, доступна є в уряді ґміны Крампна до 11. січня/януара 2022 р.