Коментар Професорів Ягайлоньского Університету про доповід проф. Гальчака

14. марця 2014 рока в Фундациі св. Володимира в Кракові одбыла ся стріча з проф. Богданом Гальчаком з Зеленогірского Університету. Пан професор выголосил доповід під наголовком Найдавнійша істория Лемків на основі джерел (поль. Najdawniejsze dzieje Łemków w świetle źródeł historycznych). 

Трансмітували сме тот реферат уж 21. марця. Выкликал він вельо коментариів і контроверсий. Орґанізаторам замітувано особливо недопущыня до свобідной дискусиі, в котрій дано бы змогу выповісти ся присутным.

Лем.фм было попрошене о можливіст награня коментариів, котры бы пояснювали одмінны од выголошеных становиска, поясняючы, попри тому, принципы методолоґіі науковых дошліджынь. Запрашаме до выслуханя проґраму в віторок о 20.00 годині, а пак по 21.00 год. повториме доповід, про котру бесіда.

Коментуют: др габ. Анджей Зємба (веце інфо за мотузком) і др габ. Олена Дуць-Файфер.