Колысочка выдала „Русиньскый язык про найменшых“

Ку кіцню 2014 р. обчаньске здружіня Колысочка, котре орґанізує і вечурні школы русиньского языка, выдало інтересну книжку під назвов „Русиньскый язык про найменшых“, котра має служыти про навчаня русиньского языка діти предшкольского віку. Така книжка в історії Русинів выходить першый раз.

На книжці робив колектів авторів Крістіна Варшова, Марек Ґай, Ян Гриб і Марія Ясикова. Як пише во вступі до книжкы Люба Кральова, председничка о. з. Колысочка, авторка проєкту і ініціаторка выданя книжкы, кідьже ся дотеперь ниґда не учіли діти в матерьскых школах русиньскый язык і не было з чого учіти наш материньскый язык в літературній нормі, навеце ани єдна учітелька в матерьской школы не кінчіла свою апробацію із русиньскым языком, ословила Колысочка Крістіну Варшову, директорку єдной із матерьскых школ в Снині, ці бы не помогла як довгорічна учітелька сотворити таку книжку про діти прешкольского віку.

Колысочка ословила і Марека Ґая із Марійов Ясиковов, авторів книжок про діти школьского віку, жебы помогли К. Варшовій і написали книжку довєдна. Кідьже была потрібна і поміч далшого скушеного автора учебників русиньского языка, колектів авторів розроснув ся о Яна Гриба.

Основнов штруктуров книжкы суть штири части рока. До окремых місяців школьского рока, або штирьох частей календарьного рока, суть уведжены темы, котры односять ся ку ним. Книжка є збудована – кідьже діти іщі не знають чітати, на слуханю з порозумліньом і комунікації по русиньскы. Авторы написали книжку так, жебы учітелькы могли гравов формов учіти діти язык, жебы го слухали і розуміли му, жебы ся діти розбісідовали за помочі рисунків і ілустрацій, котры до книжкы нарисовала вытварничка Алена Седлакова. Книжка є досправды повна красных ілустрацій, стишків од нашых русиньскых авторів, співанок і гер. Не бракують ани гаданкы.

Як пише далше во вступі Люба Кральова, голвоным цільом выданя той книжкы было дати до рук учітелькам і дітьом в матерьскых школах методічный, часточно і робочій матеріал і в будучности Колысочка хоче выдати робочій зошыт про діти в тій віковій катеґорії. Выдаватель надіять ся, же книжочка збудить інтерес родічів Русинів і їх дітей о навчаня нашого языка уже в матерьскых школах.

Публікація была выдана дякуючі фінанчной дотації Уряду влады Словацькой републікы з проґраму Култура народностных меншын 2014.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА