Книжковий Гокус Покус (нажыво) – неділя, 20.00 год.

О книжках, котры являт ся в днешнім Языковым Гокусі Покусі (названым до вечера – книжковым) писали сме уж на нашым портали. То цінны позициі, о котры збогатила ся бібліотека Руской Бурсы, будучы університетскыма учебниками з обшыри русиньского языка:

1. Андрия Антоняка – Вступ до теориі літературы,
2. Валерия Падяка – Істория карпаторусиньской літературы і культуры,
3. Анны Плішковой – Лексиколоґія і словотворіня русиньского языка,
4. Кветославы Копоровой – Фонетыка, фонолоґія і акцентолоґія русиньского языка,
5. Василя Ябура – Морфолоґія і синтаксис русиньского языка.

Выдавцьом книжок єст Інститут Русиньского Языка і Культуры Пряшівского Університету, котрым завідує проф. Анна Плішкова.

Языковий Гокус Покус – радийовий проґрам про лемківскій язык во вшыткых його аспектах і просторах. Премєра в неділю 23. серпня о 20.00 год., повторіня о ден, в понедільок о 2.00, 8.00 і 14.00 год. за лемківскым часом. Лем в радию лем.фм!