Хто робит, а хто… но власні, што?

Шторічный поділ дотаций Міністерства Внутрішніх Справ і Адміністрациі на реализацию задач, котрых цілю є охорона, захованя і розвиток культуровой достоменности нацийональных і етнічных меншын в Польщы оголошеный был перед парома днями на сайті міністерства.

І стал імпульсом зробити рахунок сумліня. Мы можеме спати спокійні. А інчы? Ци бояти ся о іх сон?

Конец грудня/децембра каждого рока то час, коли Міністер ВСіА оголашат список дотаций на реализацию задуманых орґанізациями задач. В опертю о сесы дотациі вельо стоваришынь веде діяльніст на хосен даной меншыны.

Для дакотрых орґанізаций є то быти або не быти, значыт, без тых грошів не сут в силі нич зреализувати. Час оголошыня дотаций то тіж момент, коли можеме підозріти, што в надходячым році плянуют робити інчы. І тото уж знаме, бо список з дотуваныма проєктами єст до вгляду.

Перезераючы го і видячы черговый уж рік тоты самы задачы, пришло мі на мысель – але што з тым роком? Або аж і попереднім? Або дакого жде барз, але то барз робітный послідній тыжден грдуня/децембра, або задачу зреализували, але так, жебы часом нихто про тото не знал і не виділ ефектів, што дакус не іде в парі з тым, по што дают дотациі.

О што мі іде? Уж поясням.

Напримір, Стоваришыня Лемко Тавер зо Стжелец Краєньскых, з його презесом священником о. Артуром Ґрабаном, на 2022 рік достало дотацию высокости 16.000 зл на проєкт пн. «Лемківска інтернетова телевізия – LEMKO TV». І того ся не чыплям, бо то допіро буде, шак іщы сідиме в 2021 році.

Але позерам на список дотаций як раз на 2021 рік, і што виджу? Ого – тот сам проєкт і 15.000 зл дотациі.

Позерам на канал LEMKO TV в сервісі YouTube і што там єст? Єден фільм. Провірюю ци добрі посортувалам. Добрі – по даті доданя. Но але дале єст там лем єден фільм зреализуваный в 2021 році.

Смотрю на 2020 рік (14.000 зл дотациі) – фільмів єст 10, наступны уж з 2019 рока. Рахунок простый: выпродукувати поєден фільм в 2020 році коштувало середньо 1 400 зл. О кілько в Стоваришыню Лемко Тавер не піднесли ставку до 15.000 зл за єден фільм то, як уж єм писала, барз робітна кінцівка грудня/децембра жде на LEMKO TV…

Подме-ле дале. Дале тіж є цікаві.

І останме при Лемко Тавер. Вдячный то обєкт до анализы чысел. А подме і тым самым путьом. Стоваришыня отримало на 2022 рік 46.000 зл на проєкт пн. «Радийо Лемко – лемківскє інтернетове радийо».

Кєд іде о 2021 рік, то дотация на тот сам проєкт вынесла 45.000 зл. І зас. Позерам тым разом на сайт радия та його фанпейдж на ґамбокнижці (так на ранті підповім, і ту хочу безпосередньо звернути ся до адміністратора того же фанпейджа: гев тіж сте зобліґуваны подати інформацию, што тот проєкт фінанусваный є з підпертьом МВСіА, не жебым ся чыпляла, лем жебы сте даякых пак проблемів не мали).

Радийо Лемко має добрый звык – кажду авдицию реклямує на своім сайті і фанйпейджы. Не лем для потенцияльного слухача є то хосен. Легко мі было зрахувати кілько выемітували авдиций, а было того 35 проґрамів. Од січня/януара 2021 рока аж дотепер, значыт другой половины грудня/децембра 2021 рока. Гммм. Штоси в ЛЕМ.фм видимо робиме не так…

Памятам як днес, якій перед парома роками суд над Руском Бурсом собі зробили інчы. А были серед них і діячы, і священникы…

Од січня/януара 2021 рока дотепер зреализували сме як ЛЕМ.фм 1206 проґрамів. Чысло тото обнимат штоденны проґрамы нажыво, штоденны інформацийны сервісы, тематичны проґрамы (природничы, публицистичны, історичны, літературны, реліґійны, розрывковы), бесіды, ретрансмісиі богослужынь, реляциі з подій.

То іщы раз. Для ясного образу – од січня/януара 2021 рока дотепер:

• Радийо Лемко зробило 35 проґрамів / 45.000 зл дотациі,
• Радийо ЛЕМ.фм зробило 1206 проґрамів / 299.000 зл дотациі.

Не можу не додати, што як ЛЕМ.фм, окрем того, што так само, як Радийо Лемко утримуєме інтернетове высыланя, мусиме іщы в рамках тых грошів утримати інфраструктуру звязану з высыланьом сиґналу через радийовы волны, што тунім інтересом не єст.

Йой – але єм ґапа, ґапа. Прецін мы іщы в тых грошах порталь робиме… Од січня/януара дотепер опубликували сме на портали www.lem.fm 1.036 постів. Єден пост то середньо єдна страна А4 тексту, значыт веце як 1000 стран зредаґуваного тексту (котрый все перед публикацийом переходит коректу). Такы статистикы маме уж пару років.

Окрем «радия» і «телевізиі» Лемко Тавер має іщы інчы проєкты. Але дам ім уж покій. Цікаве, ци копати лежачого мают серед фішок Faj po swomu – Фай по свому?

То може скочме зеркнути на скоро, як там проєкты Фундациі Стара Дорога. Не виджу іх серед бенефіциєнтів дотаций МВСіА на 2022 рік, але в 2021 і 2020 році достали м.ін. по 15.000 зл на часопис «Лемколянд». На сайті, де мож го замовити (свойом дорогом і на него што рока признают в МВСіА дотацию, але дарую си анализувати зміну контенту), як найновшый номер видиме #20 з 2019 рока, а офіцийный сайт Фундациі нияк не діє.

Ци хочу смотріти на дальшых і так само доказувати на напр. варштаты, выставы, івенты, активности ци публикациі реальны як призрачный потяг? Не хочу, ани той анализы не мала єм охоту робити.

Але памятам як днес, якій перед парома роками суд над Руском Бурсом собі зробили інчы. А были серед них і діячы, і священникы (!), і просто каждый, хто лем чул ся одважный штоси написати.

До той поры нихто не перепросил за лжы, шыріня неправды, попыханя до ненависти – за мішаня нас з болотом.

А мы робили і дале робиме своє.

Веселых свят!