Христос Воскрес!

Радосну вість несут нам дзвоны. Вість тота розносит ся скоро, наполнят людскы сердца и доходит до найнедоступнійшой закутины.

Христос воскрес! Христос воскрес! повторяют днеска все, стары и молоды, богаты и бедны, здоровы и недужны.

По страстях и мученической смерти на кресті воскрес Спаситель світа и побідил смерть в цілой Божественной славі.

Місце Єго страстей, місце мученической смерти на кресті, місце святійшого Гроба были близкы Єго Світлому Воскресеню. Так „подобало Христу пострадати, быт распятым, умерти на кресті и третого дня воскреснути”. Єго страсти — то лем ворота до Єго побіды и славы. И чим тяжши мукы задавано Христу, чим больше утікало с Него житє, тым близший был Спаситель нового, світлого, Божественного житя. По муках пришло скоро світле воскресенє!

В терпіню и мы близкы воскресеня. Мук и крестов переживами всі много. Не был свободный от них Сын Божий, не освободит от них Господь и с нас никого. Под тыма муками нераз мы угынаме ся, тратиме віру во власны силы, охоту до дальшого житя. Але Всевышный не кладе на никого тягару, перевысшаючого єго силы, котрого мы бы не могли перенести и чим кара Єго ест тяжша, тым помоч Божа близша.

Переходят скоро недугы, недостаток, душевны болі и прикрость от других, а на их місце вертают силы, добробыт, спокой и дружба ближных. По терпінях близке воскресенє!, по смерти близка нова, світла жизнь!

Днеска, коли всі тішиме и радуєме ся світлым Христовым Воскресенєм, не падайме на духу и надійме ся на Воскресшого Христа!

Он скоро воскрес из мертвых, Он и нас скоро выбавит с наших бід и смутку!