Карпатьска писанка образом і словом

Традіцію меджінародной конкурзно-презентачной выставкы писанок і великодных декорацій під назвов Карпатьска писанка приносить тот рік Вігорлатьскый музей в Гуменнім в зміненій – онлайн формі на вебсайті музея.

Орґанізатор шторічной выставкы з причіны пандемії робить тот нетрадічный річник Карпатьской писанкы в рамках онлайн проєкту Музей на дома. Інформовала о тім Яна Федічова з гуменьского музея.

В ретроспектівній колекції архівных документів – образом і словом приносить Карпатьска писанка 2021 образкы із 28 попередніх річників той музейной події і коротку ґенезу выникнутя і розвитку найвекшой меджінародной выставкы писанок на Словакії, котра розвивать ся в просторах Вігорлатьского музея в Гуменнім.

„Од свого початку на выставці писанок у Вігорлатьскім музею в Гуменнім презентовало ся понад 500 авторів із вшыткых реґіонів Словакії, а пізніше і авторы з Україны, Польщі, Мадярьска, Чеськой републікы, Румунії і Споєных штатів Америкы. Окреме місце в збірковім фонді писанок Вігорлатьского музея в Гуменнім має цінна репліка писанкы з Україны, котра є із 15-го столітя,“ інформовав музей.

Великодны варіації музейной понукы Карпатьска писанка 2021 доповнює презентація великодных поздоровлінь і поштовых карток із збіркового фонду гуменьского музея, а так само інтересный історічный екскурз до історії сімболікы крашіня яєчок.

Музей думав і на діти. Забавна Карпатьска писанка у формі робочіх листів і пексеса є приготовлена в рамках довгодобого едукачного проґраму Вігорлатьского музея в Гуменнім.

„Карпатьска писанка 2021 як одданя почливости вшыткым носителям културной традіції, котры заслужыли ся о всокочіня по ґенерації плеканых звычаїв і умелецького таленту, буде людям приступна на вебсайті Вігорлатьского музея в Гуменнім,“ інформовала Федічова. Выставку собі можете посмотрити за тым мотузком (клікнути на Karpatská kraslica).

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА