Kардінал Кох стрітив ся з ґрекокатоликами і православныма. Нагородили го медайлов Пряшівской універзіты

В днях 28-го аж 30-го марца 2023-го року на Словакії на навщіві є префект Дікастерії на підпору єдности хрістіанів, кардінал Курт Кох.

Кардінал вже навщівив Кошыці, Михалівці, Пряшів, а остатній день буде в столиці державы – Братіславі.

Навщівив Михалівці і Клокочів

Проґрам кардінала Коха зачав у віторок на выході Словакії. 28-го марца абсолвовав стрічу з представителями Михалівско-кошыцькой православной єпархії. Префект дікастерії посмотрив собі і Катедралный собор святых Кіріла і Методія в Михалівцях.

В тот день завітав і до ґрекокатолицького путницького центра в Клокочові, де молив ся перед Іконов клокочівской Богородіці.

Пополідне одышов до Кошыць, де помострив собі Музей жертв комунізму, стрітив ся з представителями міста і кошыцькой екумены, посмотрив собі вєдно з кошыцькыма римокатолицькыма єпіскопами Катедралу святой Єлизаветы. Вечур в ґрекокатолицькім Катедралнім соборі Рождества Пресвятой Богородіці быв участный на екуменічнім концерті, котрый орґанізовав ся з нагоды його навщівы.

Нагородженый медайлов

В середу Кардінал Кох пришов до Пряшова, де го дополідне прияв на Ґрекокатолицькім архієпіскопскім уряді владыка Петро Руснак, апостольскый адміністратор Пряшівской архієпархії.

Вєдно з кошыцькым єпархом, владыком Кірілом Васыльом, і помічным братіславсыкм єпіскопом, владыком Міланом Лахом, посмотрив собі експозіцію о історії Ґрекокатолицькой церькви, котра є в просторах архієпіскопской резіденції, як і Катедралный собор святого Йоана Крестителя, де поклонив ся мощам блаженых священомучеників, єпіскопів Павла Петра Ґойдіча і Василя Гопка.

Пак кардінала прияв декан Ґрекокатолицькой теолоґічной факулты Пряшівской універзіты Петро Штурак, де была кардіналови уділена Памятна медайла Пряшівской універзіты. Авдіторія могла в просторах факулты выслухати лекцію префекта дікастерії на тему Можность єдности в тайнах меджі католиками і православныма.

Пополідне кардінал навщівив православного пряшівского архієпіскопа і метрополіту чеськых країн і Словакії – Його Блаженость Ростислава.

Остатній день в Братіславі

Тридньовый проґрам кардінала Коха завершыть ся в четверь в Братіславі. При нагоді недавного 35-го юбілею Свічковой маніфестації положыть вінець при памятнику на Гвієздославовій площі. В столиці ся стрітить і з Екуменічнов радов церьквей, а буде гостьом сімпозіюма з назвов Меджіреліґійный діалоґ, завершіня 7-ох років меджіреліґійного діалоґу меджі жыдівсков і католицьков комунітов.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА