Капличка в Ліщынах і крест в Климківці покрасніют

Капличка в Ліщынах і крест в Климківці перейдут ґрунтовный ремонт. Самоуряд Малопольщы розділил 700 тис. зл з тогорічного буджету воєвідства на дофінансуваня реновациі придорожных капличок. Разом поведе ся того рока выремонтувати 96 капличок, придорожных крестів і фіґур святых, што улокуваны сут в цілій Малопольщы, з чого два вытипуваны до ремонту обєкты находят ся на Лемковині.

Середкы на ремонты і консервациі придорожных капличок розділяны сут в рамках орґанізуваного што рока конкурсу «Капличкы Малопольщы». Напрямленый є він на самоуряды, котры до конкурсу можут зголошувати єден обєкт зо свого терену. Максимальні мож отримати 40 тис. зл, а квота дофінансуваня не може перекрочыти 60% цілого кошту ремонту.

По єдній на каждый рік. Для будучых

«Што рока складаме внесок о ремонт в рамках конкурсу Капличкы Малопольщы і што рока достаєме і ремонтуєме» – оповідат Івона Маркович з уряду ґміны в Устю Рускым. Не інакше буде і того рока. Ґміна Устя Рускє зложыла внесок о дофінансуваня ремонту капличкы в Ліщынах.

Нейвекшым проблемом капличкы, што єй найдеме при церкви св. Лукы в Ліщынах, єст місце положыня обєкту – на убочы, через што капличка наражена є на осуваня. В рамках задачы буде зроблена головні стабілизация посадовліня – предовшыткых зроблят фундаменты, пак одремонтуют інчы єй части.

«Буде проведеный ремонт зовнішніх і внутрішніх стін, ремонт підлогы, дашка, а тіж реновация зовнішніх дверців до капличкы» – вычыслят Івона Маркович. Ціліст робіт рахуваня є на коло 30 тис. зл, з чого Уряд Малопольщы дофінансує квотом 14 тис. зл, з внескуваных 17 тис. зл – решту грошів Уряд Ґміны мусит забезпечыти зо своіх середків.

Як підкрислили в пресовым комунікаті Маршалківского Уряду – «цільом конкурсу єст заховати для будучых поколінь вартістны обєкты, што становлят важный елемент культуровой спадковины реґіону».

«Капличка в Ліщынах то єдна з нечысленных, яка находит ся в евіденциі ґмінного реґістру памяток. Єй технічный стан є уж барз планный, зато рішыли сме зголосити капличку до тогорічной едициі конкурсу» – дополнят І. Маркович.

Єдна ґміна або повіт могли зголосити до конкурсу максимальні єден обєкт зо свойого терену. Самоуряды могли зголосити тіж роботы ведены при капличках, што сут приватны – вымогом єст спілпраца з властительом обєкту. Так было в примірі ґміны Ропа.

Пишут писма

«Зголосила ся до нас писемно жытелька Климківкы, властителька ділянкы, на котрій находит ся капличка з 1912 рока, о поміч в єй ремонті» – оповідат Томаш Зайонц з уряду ґміны Ропа. «Приіхали сме на місце, обфотоґрафували, згодили сме ся, што вымагат скорой консервациі і реновациі» – дополнят.

«Од Маршалка маме 8,5 тис. зл дотациі, а кошт робіт то близко 30 тис. зл. Решту мусиме доложыти з ґмінного буджету. Будут зроблены будовляны роботы – одкопаня фундаментів, вертикализация, выконаня ізоляциі проти вільготи, та консервацийны – обчыщыня камінніх елементів, дополніня браків, імпреґнация і консервация дашка» – оповідат урядник ґміны Ропа.

О кілько не трафит ся дака аварийна ситуация, што треба буде конечні ремонтувати інчу капличку, то в будучым році ґміна Ропа буде ся старала о дофінансуваня ремонту капличкы в Лоси, што находит ся при дорозі на Білянку.

В дотеперішніх едициях конкурсу «Капличкы Малопольщы» од 2009 р. од знищыня сохранили веце як 620 памятниковых обєктів на обшыри цілой Малопольщы. Самоуряд речены ремонты підпер квотом веце як 5,5 млн зл.

Першы ремонты в рамках того конкурсу на Лемковині зреализували в 2010 р. в Ждыны – выремонтували товды дві капличкы. Пак в черговых роках выремонтували капличкы ци кресты в Лоси (три ріжны обєкты), Устю Рускым (два обєкты), Ганчовій, Чарній, Бодаках, Бересті і Войковій.