Календар 2017: Світ Бойків і Лемків

Хоц допіро конец серпня/авґуста 2016 рока, выдавництво Лібра напечатало уж календар на 2017 рік, посвячений Бойкам та Лемкам,  в котрым находят ся архівальны фотоґрафіі звязаны з тыма двома ґрупами, іх натуральным жытлиском – Лемковином і Бойкiвщыном, та материяльном дідовизном. В середині, на штырнадцетьох сторонах найдете фотоґрафіі дослідника, етноґрафа проф. Романа Райнфуса, котрий долгы рокы ходил по Лемковині і записувал тото, што жыло перед 1947 роком, але тіж документувал траґічний повыселенчий стан русиньской дідовизны.

Влони был напечатаний великій альбом пн. Карпатскій світ Бойків і Лемків. Роман Райнфус. Фотоґрафіі. Сесе выняткове выданя вказало на богату спадковину лемківскых Русинів. Внутрі находят ся знимкы вшелякого рода. Райнфус, одвиджуючы Лемковину, занимал ся фотоґрафуваньом не лем культуры материяльной, але його знимкы вказуют тіж просте жытя тамтышніх жытелів. В книжці найдеме вельо цінных знимок, презентуючых лемківскы церкви, хыжы, капличкы, ци цмонтері. Окрем фотоґрафій, в альбомі находят ся архівальны документы. Власні част з реченых знимок тепер остало напечатаных в календари на 2017 рік.

Календар доступний до придбаня в вельох інтернетовых склепах та книгарнях, а спомнений альбом доступний єст в Біліотеці Руской Бурсы в Ґорлицях.