Йоганн Штраус (сын), «З повагом», просит Павел Малецкій – неділя, 20.00 год.

«Король вальця», як звали (головні з зависти о успіхы) Йоганна Штрауса сына, компонувал не лем вальці. Окрем того найпопулярнійшого в ХІХ ст. танця, компонувал кадрилі, мазуры, ґальопы і полькы.

Йоганн Штраус (1825-1899) был сыном знаного композитора, так само Йоганна. В таємници перед вітцьом вчыл ся грати на фортепіано і гушлях. Вчыл ся тіж компонувати. В 1844 році дебютувал, дириґуючы свойом танцувальном оркєстром. О штырі рокы остал музиком Нацийональной Ґвардиі, компонуючы маршы і полькы. В Відни зачала царствувати музика обох Штраусів.

По смерти вітця, выіхал на турне по Німцях, Росиі, Польщы і ЗША, котре принесло му славу. В 1862 році оженил ся зо співачком Етті Трефц. В роках 1863-1870 был директором балів на віденьскым дворі, а в 1872 році достал запрошыня до ЗША на серию концертів з нагоды сотной річниці здобытя незалежности през Американів. Од 1863 рока оркєстру вели як постійны дириґенты його братя – Йозеф і Едуард. По смерти жены в 1878 році двакрат ся іщы женил. Вмер на 74 рокы.

В проґрамі почуєте найславнійшы творі того композитора, м.ін. вальці: «Імператорскій», «Над прекрасным блакітным Дунайом», увертуру до опереткы «Помста мышпергача», полькы: «Свято Огня», «Tritsch-Tratsch» ци «Pizzicato» (котру скомпонувал з братом Йозефом) та інчы його творы і популярны копозициі інчых кялсиків.