Ізбянин угоноруваний стипендийом Презеса Рады Міністрів!

Мило нам поінформувати, же Павел Стариньскій, ученик ІІ Загальноосвітнього Ліцею ім. Станіслава Выспяньского в Ліґници, остал лавреатом стипендиі Презеса Рады Міністрів. Нагороду признано Павлови за ціліст выдатных шкільных осягнінь, м.ін. за занятя ІІ місця в XLIII Загалнопольскым Статистычным Конкурсі (орґанізуваным Головным Статистычным Урядом), як тіж за позашкільну діяльніст – Павел єст актывным членом Ансамблю Пісні і Танця Кычера з Лігниці, якій славит лемківскій фолкльор по цілым світі.

Торжественне вручыня стипендиій проходило 5. листопада т.р. в Канцеляриі Презеса Рады Міністрів, а вручала іх сама пані премєр – Ева Копач. Додатковым выріжніньом, якым обдарено Павля Стариньского, было вытипуваня го Вроцлавском Кураторийом Освіты репрезентувати на торжественній подіі вшыткых лавреатів з Нижнього Шлеска. Як додає скромні лавреат – великы подякуваня належат ся моій учытельці ґеоґрафіі Барбарі Куці, завдякы котрой повело ся мі выграти конкурс, за котрым вшытко пішло дальше. Додає тіж, же школа, до якой ходит, є выняткова, як іде о трактуваня Лемків, а і самы лемківскы школяре актывні діют в жытю школы, то і не без причыны єст о Лемках голосно! Мій близкій приятель Адриян Чупак достає выріжніня в престіжовых математычных конкурсах – бесідує Павел. Школа Павла то тіж місце, де здавана была історична – бо перша, матура з лемківского языка. Тым першым одважным был Данько Возняк, його слідами пішол старший колеґа Павла – Северин Косовскій, матуриста з минулого рока. Сам Павел іщы не знат, ци буде здавал матуру з лемківского, хоц на занятях з рідного языка был присутний, одколи была така можніст, зато і певно проблему зо зданьм бы не мал. Лемківского вчыл ся в пункті вчыня при Стоваришыню Лемків в Ліґници під оком п. Лукы Возняка, якого барз мило споминат. Заінтересуваня мат барз шырокы, бо хоц єст в клясі о математычно-фізичным профілю, то цікавит ся тіж історийом і ґеоґрафійом, коли лем може, іздит з выступами з Кычером по цілым світі, а іщы до того – гоббістычні вчыт ся церковнославяньского языка при Осередку Співу Церковнослявяньского Языка в Цєпліцах. І з того вшыткого, не знат іщы де выбрати ся на студия. Зато коли выберат ся даґде по світі, тым близшым і тым дальшым, з гордістю маніфестує, даючы примір інчым – меньше одважным – своє привязаня до лемківского народу. Уж од дакых двох років всядиль товаришыт му лемківска фана (была аж і в Хінах!). Не інакше было і тым разом – навет сама пані премєр не одмовила позуваня з ТАКЫМ оказом…

Історийом свойой родины і своіх дідів Павел жыво ся інтересує, здраджат, же мат в домовым альбомі унікатовы знимкы з гір зо сел його предків – більшіст жыла в Ізбах, баба од стороны мамы выводила ся з Флоринкы, а і з Зындрановой даякій прапрадідо бы ся нашол… – кінчыт Павел.

В імени цілой редакциі сердечні ґратулюєме того выняткового выріжніня – барз сме горды, же такы здібны і мудры сут молоды Лемкы.

(на знимці премєр Польщы Ева Копач зо стипендистом Павлом Стариньскым, фот. архів П. Стариньского)