Іван Міклош. Русин зо Словакії шефом порадців в Києві

Бывшый словацькый міністер фінанцій Іван Міклош ся став шефом порадців україньской міністеркы фінанцій Наталії Яреско. Інформують о тім україньска аґентура Unian і сервер Ukraine Today.

За інформаціями україньскых медій ся буде Міклош занимати головно вопросами в области дані, децентралізації і цілковой реорґанізації верейных фінанцій. Міклош є далшым чуджінцьом, од котрого собі Україна обіцять зліпшіня свойой економічной сітуації. Сама Наталія Яреск ся народила в США і україньскым міністром господарьства є чоловік із Літвы – Айварас Абромавічіюс. В децембрі ся намістниками на міністерстві справедливости стали фаховці з Літвы і Ґрузії.

Іван міклош ся народив 2-го юна 1960 р. у Свіднику. Быв во веце функціях в різных чехословацькых і словацькых владах по 1989 р. Перед переписом людей у 2011 році на Словакії, коли русиньскы орґанізації робили кампань, жебы люди голосили ся ку свому русиньскому походжіню, Міклош публічно написав о тім, же є Русином, і же ся ку тій народности буде в переписі голосити.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА