IV. Русиньска Конференция про ґенеалоґію і спадковину

ІV. Русиньска Конференция про спадковину і дідовизну – під такым наголовком пройде подія орґанізувана в найблизшу суботу, 22. жолтня/октобра т.р., в штаті Пенсильванія, ЗША (точний адрес: King’s College, 133 N River St, Wilkes-Barre, PA 18702). В рамках конференциі будут выголошены прелекциі дотуляючы зрозумліня русиньской ґенеалоґіі, єй специфікы, та досліджынь в ХХI ст. серед Русинів Пілнічной Америкы.

Конференцию выполнит доповід пн. Я Русин, най ся зачне моя подорож / I am a Rusyn, Let My Journey Begin, котру запрезентує Том Пітерс. Дальше Джім Гуратяк представит занимаючу тему русиньской ґенеалоґіі, в повзязаню з досліджынями DNA / DNA & Rusyn Genealogy. За том темом, черговы дві доповіди будут повзязаны з Русинами в Сербіі та Польщы. Ґабрієль Колєсар выповіст ся про Войводину, як жытлиско сербскых Русинів, котры мают власний, войводиньскій вариянт русиньского языка, як і долгу історию про соспільну і політичну діяльніст. Проф. Поль Бест даст коротку наголовком доповід, але шыроку змістом пн. Лемкы / The Lemkos. 

На стрічы буде мож придбати русиньскы ґаджеты, як і спомочы ся в інтерпретациі і зрозумліню всякой документациі тыкаючой русиньскых справ. Деталі – за мотузком.