IV Медженародний Конґрес Русиньского Языка. Полна трансмісия нажыво – лем в радию лем.фм!

Приближат ся час IV Медженародного Конґресу Русиньского Языка, котрий, з нагоды 20. річниці святочного выголошыня кодифікациі русиньского языка на Словациі (писали сме о тій подіі гев), буде проходил 23.-25. вересня (септембра) 2015 р. в просторах Пряшівского Університету. Його орґанізатором єст Інститут Русиньского Языка і Культуры, єдиниця університету, котра діє од 1. марця 2008 р., континууючы проґрам вчыня з обшыри карпаторусиністыкы, ведений на Пряшівскым Університеті од 1998 рока.

З радістю хочеме поінформувати, же – завдякы спілпрацы, прихыльности і помочы зо стороны ІРЯіК – цілий конґрес будеме НАЖЫВО трансмітувати в радию лем.фм, што тішыт нас тым більше, же то єдна з важнійшых, кєд не найважнійша тогорічна подія в русиньскым, не лем тым науковым, світі.

Уж в четвер і пятницю, од самого рана, триє редакторы, котрых найчастийше чуєте з краківского, пряшівского, або варшавского студий лем.фм (Богдан Ґамбаль, Петро Медвідь і Демко Трохановскій), тым разом, хоснуючы мобільне студийо, принесут Вам полну реляцию нажыво, збогачену о коментарі і бесіды з делеґатами і участниками IV Медженародного Конґресу Русиньского Языка.

З причыны жывого переносу з Пряшова, на два дни змінит ся дакус ґрафік нашого высыланя. Детальний проґрам подаме Вам в найблизшу середу.

Позерайте долов на проґрам IV Медженародного Конґресу Русиньского Языка, клікаючы на заміщены файлі (отверают ся в новым вікні). Тішыме ся на стрічу!