«Історик і проблемы будуваня народу: наукова і соспільна робота Павла Роберта Маґочія» – четвер, 10.30 год.

В минулу пятницю 21. червця/юнія 2024 р. в просторах Пряшівского Університету прошла презентация книжкы авторства Володиміра Фенича пн. «Історик і проблемы будуваня народу: наукова і соспільна робота Павла Роберта Маґочія». Просиме слухати ретрансмісию зо стрічы в четвер 27. червця/юнія 2024 р. о год. 10.30 на антені радия ЛЕМ.фм.

Проф. Павел Роберт Маґочій то сучасный американьско-канадийскій і русиньскый історик, котрый професийно занимат ся украіністиком і русиністиком, є автором понад 900 публикаций, в тым – близко 70 книжок.

Цілю новопечатаной книжкы Володиміра Фенича было ретельно і дрібницьово вказати вельорічну роботу професора. Автор довюл материялы о професорі до формы 31 нарисів, якы занимают ся окремыма обшырями жытя і роботы професора Маґочія. Представлят го комплексово – як вченого, історика обще, украіністу і русиністу. По нарисах поміщены сут окремы фаховы темы і публикациі, котры Маґочій на даны темы выдал.

Чытач, головні тот з фаховых кругів, но не лем, завдякы книжці має в руках найполнішый образ єдной з найвызначнішых русиньскых сучасных особовости.

Автор на презентациі повіл м.ін., же книжка не є лем роботом, котра концентрує ся на Маґочію як карпаторусиністі, але хоче комплексово представити особу бывшого председы Світовой Рады Русинів, включні його вклад до украіністикы, і то не малый, кєд же Маґочій має так само велику і незаступну ролю в тій науковій обшыри.

«Намагал єм ся проанализувати вшыткы основны роботы Маґочія, котры дотуляли ся американьскых студий, канадийскых, европеістикы, середньой Европы, ріжных мікропроблемів, украіністикы, з чого має барз вельо робіт, і найлюбленішой дітины – карпаторусиністикы» – подал Фенич.

Слухайте ретрансмісию зо стрічы в четвер 27. червця/юнія 2024 р. о год. 10.30, повторіня в ночы з четверга на пятницю о 3.00 год. та в суботу 29. червця/юнія о 9.00 год.