Іщы лем місяц тырват Нацийональне Повселюдне Списуваня

Іщы лем місяц тырват в Польщы Нацийональне Повселюдне Списуваня. Списаня ся то не лем наше право, але і громадяньскій обовязок выникаючый з законів. Хто того іщы не зробил – заохочуєме фурт зробити інтернетовый самоспис.

Результаты спису можут мати ріжне значыня. Но, для нас – вызнаной державом меншыны – результаты спису будут мати предовшыткым значыня повязане з простым рахунком – кілько нас є, ци нас прибыло, ци може наше чысло ся зменшыло. Тото в порівнаню до списів з 2002 р. і 2011 р. може ся ріжнити.

Желаме сой заєдно, жебы результат был іщы раз поправленый, так як было то односно чысла Лемків в Польщы в списі з 2002 р. і пак з 2011 р., кєд наша списова чысленніст такой ся здвоіла. Хоц офіцияльны даны, подля ріжных опіній, не оддзеркаляют реального чысла Лемків прожываючых в Польщы.

Але хосенны результаты спису можут мати і другє значыня. Є то повязане з тым, што называт ся морале (моральный дух), кєд же нарід потрібує часто того, што додає силы, надіі і доброго пізріня на будуче.

Напевно высшый процент осіб, якы задекляруют лемківску (русиньску) нацийональніст і лемківскій язык як материньскій, доведе до того, што нашы надіі і стремліня до розвитку будут зміцнены.

Перед самым списом, а і в часі його тырваня, в Польщы проходят просписовы кампаніі. Окрем загальнорусиньской кампаніі («Сме Лемкы»), котру в Польщы найактивнійше веде Стоваришыня «Руска Бурса» в Ґорлицях, до якой долучыло тіж Стоваришыня Лемків, ведена єст іщы єдна кампанія, орґанізувана через середовиско молодых активістів з Вроцлавя – під назвом «ЯЛемко».

Нацийональне Повселюдне Списуваня зачало 1. квітня/апріля 2021 р. До кінця вересня/септембра єст іщы вельо часу, зато треба выполнити не лем громадяньскій обовязок, але предовшыткым обовязок взглядом предків і родины, сусідів ци просто краянів.

Інтернетовый формуляр выполнити мож на сайті www.spis.gov.pl. Ціліст занимат лем пару хвиль, но про нацийональны і етнічны меншыны найважнійше значыня мают два звіданя – про нацийональну приналежніст і язык, якій хоснує ся дома.