Іршавскє дружство плеканя лену – «Говорить Пряшів» – пятниця, 20.00 год.

Радийо Русин.фм з Братиславы як каждый тыжден приносит процийку вісти о плянуваных культурных подіях і роботі русиньскых інституций – музею, театру і ансамблю Пульс.

Книжницьом.фм заряджат бібліотекар Ігор Латта. Днеска буде чытал стишкы Івана Калинича з Підкарпатя.

Целебритом того тыжня буде спілоснователь ґорлицкой Руской Бурсы, вызначный лемківскій діяч і русиньскій священник – Василь Курило, родом зо села Липна на Лемковині. Роздумы Теодозиі Латтовой в Припоминці будут тыкати ся яри і майового дощу. А наконец признаме, што робота в загорідках, на луках і пасіках то лем на хосен каждому. А робота в европарляменті то лем на хосен некотрых.

Петро Медвід в Перличках прочытат пару статий з мая 1941 р., якы надрукуваны были в підкарпатскій ґазеті «Карпатска Неділя». Буде про будову новой церкви в Доробратові, выданя обществом наук новой руской ґраматикы. То перше выданя ґраматикы од Івана Гарайды, бывшого професора університету в Кракові ім. Ягайла. Основало ся Іршавскє Дружество на плеканя лену. На конец ганьблива віст про борбу з пияньством денатуры на Підкарпатю.