Інвестициі в ґорлицкым реґіоні

В рамках другой едициі Урядового Фонду Польскій Лад: Проґрам Стратеґічных Інвестиций до ґорлицкого реґіону трафлят новы дофінансуваня. В повіті будут м.ін. модернізувати дорогы.

В понедільок 30. мая на ґорлицкым рынку символичны чекы одобрали представникы місцевых власти: староста ґорлицкого повіту Мария Ґубала, бургомайстер Біча Мирослав Вендрихович та заступця бургомайстра Ґорлиц Лукаш Балаєвич.

Ґорлицкій Повіт отримат близко 9,65 млн зл на модернізацию повітовых доріх на обшыри ґмін Санкова, Ропа, Лужна, Бобова. В рамках дальшого дофінансуваня (4,65 млн зл) хоче одбудувати мосты на трасі Бобова-Бжана.

Новый міст в Высовій

Уж в віторок 31. мая в Повітовым Старостві прошла стріча з участю представників самоуряду та выконавців інвестиций звязаных з ремонтами доріг. На розбудову жде повітова дорога Ропа-Высова-Бліхнарка-границя державы в Высовій з розобраньом старого мосту і будовом нового вєдно з доіздами. Місцевы жытелі од років просили о ремонт особливо реченого мосту.

В примірі міста Ґорлиці, то в рамках дофінансуваня плянуют м.ін. провести другій етап ремонту одркытого басену ци выремонтувати дорогы і уличкы в самым центрі міста.

Інвестициі в Крампній, Дукли, Репеди

В сусіднім підкарпатскым воєвідстві з грошів ідучых з проґраму «Польскій Лад» розбудуют м.ін. основну школу в Крампній, зроблят ходник од Крампной до Котани, выремонтуют дорогу і ходникы в Івоничы, Рыманові, Дукли – там тіж змодернізуют освітліня, розбудуют дорогу Мысцова-Поляны на потребы плянуваной будовы водного резервуару.

В рамках розбудовы основной школы в Репеди добудуют ґімнастичну салю, предшколя, боіско, пляц забав і паркінґ. В Команчы же перебудуют будинок желізничной стациі на потребы Центра Інтеґрациі і Соспільной Активізациі на пограничы Східніх і Західніх Карпат.