Інтервю з владыком Єремійом, Архієпископом Вроцлавскым і Щеціньскым – пятниця, 20.00 год.

Владыка Єремія то православний теолоґ, знаний на цілым світі зо свойой дослідничой працы. Єст архієпископом вроцлавако-щеціньской єпархіі ПАПЦ, в котрій велика част вірных і священників то Лемкы. Того рока, з нагоды Різдвяных Свят, редакциі радия лем.фм вынятково повело ся провести з владыком інтервю. Владыка одповідат в ним на пару звідань про Лемків і ролю русиньского языка в православній Церкви.

Інтервю будете мати нагоду выслухати в Святий Вечер о 20.00 год. на антені нашого радия.

Владыка Єремія вродил ся 3. жолтня/октобра 1943 рока в Одринках, під світскым іменом Йоан Анхімюк. Маючы штырнацет років, вступил до православной семінариі в Варшаві, а пак континуувал вчыня православного богодловя в Християньскій Теолоґічній Академіі. По обороні маґістерской працы і закінчыню едукациі в ХТА, продолжал науку в Московскій Духовній Академіі в Заґорску та Університеті в Цуріху.

По закінчыню едукациі в Швайцариі, Йоан Анхімюк вернул до Варшавы, де остал выховавцьом і выкладовцьом в Православній Духовній Семінариі. Гын же зачал свій дослідничий пут – в рр. 1971-1976 был шефредактором офіцияльных новин Польской Автокефальной Православной Церкви «Wiadomości PAKP». В тым часі зачал тіж свою діяльніст в екуменічным руху. В рр. 1975-1991 был членом найвысшого заряду Світовой Рады Церкви (World Council of Churches).

Активні діял з молодежом, на початку были то середовы стрічы попри парохіі в Варшаві, пак в цілій Польщы. Был ініциятором Кружка Православных Теолоґів в ХТА і причынил ся до покликаня Братства Православной Молодежы.

По обороні докторату, а пак габілітациі, од 1981 рока проводил катедрі Еґзеґезы Нового Завіти ХТА.

Початком 1983 рока Йоан Анхімюк принял монашество і был высвячений на діякона, а пак священника. В марци того рока хіротонізуваний на єпископа, остаючы вікарийом митрополиты і єпископом Більскым. В вересни владыка обнял вроцлавско-щеціньску єпархію, а в 1997 року был піднесений до ранґы архієпископа.

В тым часі был тіж выбраний ректором Християньской Теолоґічной Академіі в Варшаві, де потім выполнял тоту функцию в ріжных періодах через три каденциі.

В рр. 2001-2016 был предсідательом Польской Екуменічой Рады, донедавна был тіж представником ПАПЦ в Медженародній Спільній Комісиі до справ Теолоґічного Діалоґу медже Римокатолицкым Костелом і Православном Церквом. Бере участ в працах Мєтковой Комісиі для ПАПЦ.

Владыка Єремія знаний єст зо свойой дослідничой працы, цінений як выкладовця – головні з обшыри священных книг Нового Завіту.

В 2012 року выданий был так званий Екуменічний Переклад Приятелів, то єст екуменічний переклад Нового Завіту, котрого, разом з представниками інчых віроісповідань (протестантскых і католицкого), спілавтором был владыка Єремія.

Владыка дотепер продолжат дидактично-наукову діяльніст в Християньскій Теолоґічній Академіі в Варшаві, де проводит катедрам Священного Писаня Нового Завіту і Священного Писаня Старого Завіту.

Фото: фейсбуковий сайт православной парохіі св. Миколая в Щеціні