Інтервю з др Мирославом Копыстяньском – новом репрезентантком Лемків в СКУтНіЕМ

В звязку з персональныма змінами в Спільній Комісиі Уряду та Нацийональных і Етнічных Меншын (писали сме гев), тыкаючыма ся лемківской етнічной меншыны, прібуєме намовити на як найскорше інтервю нового члена той Комісиі, тым більше, же засыпуєте нас звіданями о особу др Мирославы Копыстяньской. Мы, по телефонічній бесіді з п. Мирославом, дознали сме ся, же найде час на выступліня в лем.фм допіро під конец вересня т.р., але надієме ся, же передаючы просьбы од слухачів радия ЛЕМ.fm і чытачів нашого порталю, заохотиме др Мирославу Копыстяньску до бесіды на темы, котры для Лемків барз важны, а з якыма прийде ся ій стрітити в засіданях і штоденній роботі в СКУтНіЕМ.

Днес, приносиме Вам коротку біоґрафічну нотку о др Мирославі Копыстяньскій, котра, рішыньом премєра ПР Дональда Туска, 1. вересня 2014 р. была покликана на нову репрезентантку лемківской етнічной меншыны в Спільній Комісиі Уряду та Нацийональных і Етнічных Меншын.

Мирослава Копыстяньска (нар. 1975 р. в Лоси), то абсольвентка політолоґіі (маґістерскы студиі на Педаґоґічным Університеті в Кракові) і доктор гуманістычных наук з обшыри політолоґіі і права (на тым же університеті), на основі докторской розправы на тему “Лемкы і Ромы в Малопольщы в роках 1989-2008. Соспільно-політычна і правна ситуация”. Єй професийний пут вюл од Уряду Ґміны в Устю Рускым, через Славяньску Ґалерию в Кракові, аж до теперішнього місця в Маршалковскым Уряді Малопольского Воєвідства, де занимат ся справами народовых меншын та медженародовом і меджекультуровом спілпрацом. Інтересує ся історийом, фотоґрафійом, туристыком, музыком і фільмом.