Інштітут завтра одпрезентує русиньску ґраматіку і збірник із конґресу

В остатніх днях Інштітут Русиньского языка і културы Пряшівской універзіты в Пряшові выдав дві новы книжкы. Першов є Ґраматіка русиньского языка, другов є збірник із 4-го Міджінародного конґресу русиньского языка під назвов Русиньскый літературный язык на Словакії – 20 років кодіфікації.

Авторами книжкы Ґраматіка русиньского языка суть Василь Ябур, Анна Плішкова і Кветослава Копорова. Моноґрафія має за ціль представити опис сучасного русиньского літературного языка кінця 20-го і зачатку 21-го столітя. Тота моноґрафія має дві первенства: першыраз выходить як комплексна публікація опису окремых языковых рівней і першыраз так само під назвов Ґраматіка русиньского языка.

Другов книжков є Русиньскый літературный язык на Словакії – 20 років кодіфікації. Є то збірник із 4-го Міджінародного конґресу русиньского языка, котрый із нагоды 20-ох років од кодіфікації русиньского языка на Словакії проходив в днях 23-го аж 25-го септембра 2015-го року в Пряшові. Лекції, якы одзвучали на тім конґресі, суть публікованы в тім збірнику. Збірник быв выданый із підпоров ґрантовой сістемы Уряду влады Словацькой републікы, проґраму Култура народностных меншын 2015.

Книжкы будуть першыраз офіціално презентованы завтра, 24-го фебруара 2016-го року, на семінарі карпаторусиністікы, о котрім ся веце можете дочітати ту.

Інтересны відеа із 4-го Міджінародного конґресу русиньского языка можете найти за тым мотузком.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА