ІнНовиця 2018

На зламі мая і червця/юнія т.р. пройде ХІ едиция Театральных Стріч ІнНовиця. То знана, циклична подія в реґіоні, котра направлена є предовшыткым на любителів альтернативных театральных інспіраций. Тогорічна ІнНовиця пройде в днях 31. мая – 2. черця/юнія 2018 р.

Місця імпрезы не треба шырше реклямувати. То лемківскє село Новиця, котре протягом дакількох років стало ся більше популярне не лем серед домашньой соспільности. За справом підниманых гын ріжномаітных акций і діяльности орґанізаций Новиця асоциює ся як село, де мож найти вельо інтересуючого і наштоден нестрічаного світа. Ґу тому доходит доста добрі захована сельска забудова, днес штораз рідше стрічана на Лемковині.

Акцийом, котра од єденадцетьох років докладат своі два ґрайцары до популяризациі села і реґіону є ІнНоциця. Так як в попередніх роках, головном цілю імрезы є представліня модерной візиі театру. В рамках того од четверга (31.05) будут проходити театральны пєсы, варштаты, концерты, проєкциі фільмів. На фестіваль запрошены сут театральны ґрупы не лем з Польщы, але того рока буде мож стрітити выконавців з Украіны і Японіі. В богатым тридньовым проґрамі запрезентує ся паруднадцет выконавців. Вечерами заплянуваны сут концерты альтернативных музычных ґруп.

Більше інформаций – на афішы.