Інформацийна кампанія МАіЦ

На вересен і жолтен того рока, Міністерство Адміністрациі і Цифризациі Польской Республикы заплянувало провести інформацийну кампанію, якой цілью являт ся збільшыня присутности меншыновых і реґіонального (кашебского) языка в публичным просторі. Акция звязана єст з ратифікуваном Польщом в 2009 р. Европейском картом реґіональных, або меншыновых языків.

Кампанія направлена єст на ріжны ґрупы: самоуряды – жебы знали, якы мают обовязкы з причыны підписаной Европейской карты, учытелі – жебы промували знаня о меншыновых/реґіональных языках, родиче – жебы посылали своі діти на лекциі материньского языка, працодавці – жебы пошырювали знаня і хоснуваня тых языків в економічній і публичній обшыри.

При нагоді кампаніі, Міністерство Адміністрациі і Цифризациі збудує інформацийный сайт о акциях, якы будут в єй рамках проходити і выдаст бюлетины, ріжны для поєдных ґруп адресатів.

МАіЦ надіє ся, же акция принесе збільшыня знаня самоурядів о правах языковых меншын, але і хосен, якій іде з іх вчыня, збільшыт кількіст діти, якы вчат ся меншыновых языків, пошырит знаня о меншыновых языках серед люди, збільшыт присутніст меншыновых языків в самоурядах і іх ролю як помічных языків, а при тым принесе більше пропозиций двоязычных назв міст і сел. Загальні – міністерияльна кампанія має збільшыти присутніст і хоснуваня меншыновых і реґіонального языка в публичным просторі.