Іконы з Новиці в Музею Никыфора

Од половины вересня/септембра т.р. в Музею Никыфора Криницкого – Епифана Дровняка в Креници буде мож позерати на выставу ікон, яку орґанізуют довєдна Округовий Музей в Новым Санчы та орґанізаторы ІХ Медженародных Варштатів Іконописців «Новиця 2017». Вернісаж выставы пройде 16. вересня/септембра, а на цілу выставу буде мож позерати до 15. жолтня/октобра т.р. 

Іконы, якы будут выставляны в креницкым музею, то діло участників тогорічных Медженародных Варштатів Іконописців «Новиця 2017». Як інформуют орґанізаторы подіі, іконы пак будут презентуваны в дальшых місцевостях, так в Польщы (Ряшів, Варшава), як і в Украіні (Львів, Луцк). Варштаты іконописців в Новици што рік проходят під дакым загальным гослом. Того рока варшаты, як і ціла серия выстав присвячена сотвореным іконам, проходят під меном «Перебожене тіло». 

Новичаньскы варшаты проходят од 2009 рока, коли то Стоваришыня Приятелів Новиці зорґанізувало першы пленеровы стрічы про малярів і іконописців асоциюваных при сучасных осередках писаня ікон в Польщы, Украіні, Білоруси ци Словациі. Спілорґанізаторами шторічных стріч сут Братство Грекокатолицкой Молодежы «Сарепта», Львівска Нацийональна Академія Мистецтв, Студия Християньского Сходу та малярі звязаны з мінском майстерньом IKONIQUE. До варштатів прошены сут артисты презентуючы заєдно православны, як і католицкы традициі. Головном цілю, яка має лучыти і єдных, і другых, є одновліня іконы як літургічного образу, што являт ся важном частю церковного жытя спільной традициі Церкви.