Іконы з Новиці на Варшавскым Університеті

Як заявлят інформацийний сайт вроцлавско-ґданьской єпархіі УГКЦ, до кінця лютого/фебуара т.р. на Варшавскым Університет (будинок Казімєжовского Палацу) выставляны сут іконы, котры представляют біблийны притчы. Презентуваны працы то результутат VІІ Медженародовых Варштатів Іконописців «Притчы», котры проходили влони в лемківскым селі Новиця. Вернісаж выставы на Варшавскым Університеті одбыл ся 19. лютого/фебруара т.р.

В пленері, котрий проходил в днях 6.-20. вересня 2015 р. в забудові Братства Грекокатолицкой Молодежы «Саперта» в Новици, взяло участ 30 артистів, м. ін. з Польщы, Білоруси, Литвы, Украіны та Ґрузиі. Были то особы ріжных віросповідань (православны, рымокатоликы, грекокатоликы), котрых вела спільна ціль – однова іконы як літургічного образу, будучого важным елементом спільной традициі. Творы, котры днес сут презентуваны в Варшаві, сут переважні выконаны на дошці, декотры на полотні.

Іконы были выставланы в ріжных місцях Европы, м.ін. в Ряшові (писали сме о тым за тым мотузком), Львові, Луцку, Городні та Креници (Музей Никыфора).

За тым мотузком, на сайті Медженародовых Варштатів Іконописців в Новици, можете пізрити на інформациі зо вшыткых проведеных дотепер едиций пленеру. А долов позерайте на фільм Стоваришыня Приятелів Новиці під назвом Новицкы Притчы, якій был зреалізуваний вчас семой едициі варштатів.