ІІІ Лемківскій Вечер в Коросні

13. лютого/фебруара т.р. од 20.00 год. в Коросні буде проходилa подія під назвом: ІІІ Лемківскій Вечер. Головном темом вечера буде любюваня… Свято залюбленых, празднуване по цілым світі  14. лютого/фебруара, не находит ся, по правді, в календари традицийных лемківскых свят, але подія буде нагодом, жебы пооповідати сой, як ся мали колиси на Лемковині справы тет-а-тет…

Орґанізаторы запросили на вечер Лемків, котры оповідят, як давнійше бывало з любуваньом, в проґрамі єст тіж почастунок з лемківской корчмы і выступ ґрупы А Де То Давнійше Строіло.

А Де То Давнійше Строіло – ансамбль з Коросна, якого фронтменками сут дві співаючы сестры – Лемкыні. Свій репертуар в великій мірі операют на лемківскым фольклорі. В 2013 р. ансамбль был фіналистом Х Ґаліция Блюс Фестіваль, а в грудни минулого рока отримал выріжніня і Нагороду Президента Міста Люблина вчас ХХV Медженародового Фестівалю Фольковой Музыкы «Фольковы Миколайкы». В своій істориі награли дотепер єдну платню пн. «Хыжа». В складі ґрупы сут: Анна Романьчак-Поляньска, Сабіна Романьчак, Якуб Ходинєцкі, Бартек Быковскі, Станіслав Ґреля і Пшемек Поляньскій.

фот. Павел Фєйдаш

Стріча буде проходила в Барі Моніка (ул. Ґродска 17) в Коросні в найблизшу суботу, 13. лютого/фебруара. Вступ 15 зл. Резервация місц під номером 13 43 217 32.