Грекокатоликы путуют в річницю обявлінь на Святій Горі Явір

99 років тому трьом Лемкыням на Горі Явір над Высовом обявила ся Пресвята Богородиция. З нагоды дальшой річниці, вірны грекокатолицкой Церкви орґанізуют піше поломництво, якє перейде з Пряшівской Руси на Лемковину – до каплиці в тым святым місци.

Поломникы выйдут ден перед річницьом – 7. вересня/септембра о 9.00 год. спід каплиці Рождества Пресвятой Богородиці в Ґабольтові на Словациі. Ґабольтівска каплиця поставлена єст на полях медже Ґабольтовом а Куровом. В самым Ґабольтові поломникы зайдут і до місцевого римокатолицкого костела.

Дальшым пунктом буде русиньскє село Цигелька, де поломникы зайдут до місцевой грекокатолицкой церкви свв. Космы і Даміана (о 16.00 год. в храмі буде служеный Молебен до св. Павла Ґойдича). Цигелька є важным місцьом для грекокатолицкых вірных з той причыны, што в 1911 р. свою приміцийну літургію одслужыл Павел Петро Ґойдич, пізнійшый пряшівскій владыка і мученик за віру.

О 17.00 год., уж на верху Святой Горы Явір, буде одлусженый в місцевій каплици Молебен до Пресвятой Богородиці.

Орґанізаторы припоминают, што поломникы повинны мати одповіднє облечыня, а тіж основны документы – в разі граничной контролі.

Тогорічне поломництво в річницю обявлінь одбуде ся уж черговый раз. Істория обявлінь на Святій Горі Явір сігат 8. вересня/септембра 1925 р., коли то три Лемкыні з Высовы вертали з посвячыня римокатолицкой каплиці в словацкым Ґабольтові. Вертали в ночы, бо хотіли неспостережені перейти через «зелену ґраницю». По тым, як перешли на польску страну, клякли, жебы подякувати за щестливе поверніня. Была то лем заповід дальшых дій. Подля переказів першы обявліня зъістили ся 21. вересня/септембра 1925 р.