«Говорить Пряшів» – пятниця, 18.10 год. Будеме продолжати Твоє діло…

Уж нич не буде так як колиси. Позавчера попращали сме нашого Приятеля, основателя нашого радия і шефредактора, бл. п. Богдана Ґамбаля. Хоц час жене дальше, то такой на хвилю вшыткы затримали сме ся в нашій штоденности, знаючы, што лемківскє соспільне жытя стратило барз вельо.

«Говорить Пряшів» то як раз тота авдиция, котру Богдан Ґамбаль барз любил. «Выходил і выдоптал» тото, жебы тот проґрам – передачы, інформациі і вісти од нашых камаратів з Пряшівской Руси, могли чути братя Лемкы з пілнічного хырбета Карпат, як і тоты розсіяны по всякых чужынах світа.

Шефредактор Богдан Ґамбаль был чловеком, котрый і в тым вымірі хосенно одбудувал Карпатску Русь, як і звязкы (преця) медже тым самым народом, розселеным днес по ріжных державах полудньово-східньой Европы. За вшытко тото сме Йому вдячны, же знал наново вказати нацийональный напрям Лемків. Фраґментом той панрусиньской діяльности была, є і уж на все буде спілпраца з камаратскым радийом Русин.фм.

Наш Богдан, перед тым, коли і я пак мал чест редаґувати заявкы сесой авдициі, за каждым разом рыхтувал іх з великым розмахом, пишучы при тым про нашы історичны діі ци важны особы з русиньского жытя. Дякую Ти, Богдане, же єс защыпил в нас духа спілпрацы і почутя новой єдности з Русинами з Пряшівщыны і Підкарпатской Руси. Будеме не лем плекати Твоє діло, але і розвивати, в почутю одповідальности за дальшы ґенерациі Лемків, Русинів.

На конец традийно – красні прошу вшыткых Вас, дорогы слухачы, на днешню премєру поучытельного проґраму «Говорить Пряшів». Зачынаме уж о 18.10 год.