«Говорить Пряшів» – пятниця, 18.10 год.

Но і першый Великден уж такой о два дни. Днес Велика Пятниця для вшыткых тых, што святкуют за новым стильом. Незалежно од того, а і може і кус зато, просиме вшыткых вас на днешню премєру «Говорить Пряшів».

Днес в части «Нашы целебриты» представиме вызначного чешского маляря, ґрафіка, чешско-мадярского походжыня родака з Мукачева, котрый зохабил шумны спомины на дітинство на Підкарпатю. О кым то буде – дознате ся, кєд лем залучыте нас вечером.

В «Перличці» буде о тым, кілько то Русины пропили на Підкарпатю в меджевоєнным і воєнным періоді і якы то мало наслідства. Зас «Припоминка» принесе нам інформациі на тото, одколи ся святкує Квітна Неділя в східній і західній церквах, і чом до храму несеме посвятити багніткы.

А в «Книжници» представиме підкарпатского писателя Миколу Бідзілю.