«Говорить Пряшів» – пятниця, 18.10 год.

Знаме уж штоси, але так по правді то «знаме, же нич не знаме». Но, бо як підходити до такого, же польскій Головный Статистичный Уряд публикує вступны результаты спису в Польщы, а про самы нацийональны і етнічны меншыны ани словечка?

Чудує тото тым більше, же нибы то порахуваня статистикы займе ім аж тілько, же найскорше детальны чысла познаме деси на осін. А яка в тым філософія, кєд люде робили інтернетовый самоспис – значыт, вшытко записал компутер. Ідучы дале – нихто не мусит ничого власныма руками рахувати…

Окрем того, кєд Словация ци Чешска Республика уж си порадили з так тяжком задачом як порахуваня чысленности меншын, то пробачте панове урядникы з Польщы – штоси хыбаль є не так. Но, але єст як єст, бо єст…

І фурт нас мучыт звіданя – што з нами, кілько нас досправды буде? Добрі бы уж было знати, хоц лем зато, же могли бы сме на горячо порівнати кількіст Русинів в ріжных европейскых державах.

Ци буде о тым в днешнім «Говорить Пряші»? Не знам, але вы мате нагоду ся дознати! Просиме.