«Говорить Пряшів» – пятниця, 18.10 год.

Повім вам щыро, же штоси ся змінят, же ідут інчы часы, чысто новы поколіня. Одходит помалы поколіня старых лемківскых діячів, тых, котры все честно стояли за нашы справы, котры выдоптали тоты стежкы, котрыма днес ходят молодшы.

Не люблю слова активіста – асоциює ся мі оно з дакым, хто веде дакы лем активности і то іщы не постійно, а час-до-часу. Слово діяч єст ліпше, але тіж не оддає вшыткого, што бы треба было в ним помістити. Мусиме знати, же поколіня такых діячів як помершый перед парома днями Павел Стефановскій (1932-2021), хоц може уж за остатні рокы не робило вельо соспільных, політичных ци культуральных діянь, то все было підпором для тых молодшых. Свідоміст, же такы люде сут серед нас, думам, давала тым молодшым ґенерациям силу, здорового духа, жебы дале робити тото, што они зачали.

Павел Стефановскій вошол через своє жытя до канону великых лемківскых діячів. Свою діяльніст зачал як особа дуже молода – заанґажувал ся в першы соспільно-політичны стремліня уж в другій пол. 50. років ХХ ст. Мал в собі тото штоси, чого на жаль, бою ся, але не мат уж днес никотрый сучасный лемківскій діяч молодого поколіня. Отже, коли явила ся потреба рішаня звороту давной будівлі ґорлицкой Руской Бурсы, зрезиґнувал він зо своіх особистых інтересів і сцедувал своє право до бурсы на загальный лемківскій інтерес – реактивуване Стоваришыня Руска Бурса. Днес на жаль каждый смотрит лем на своє. То велика чест, жебы знати так поступити. Тамто поколіня не мало партикулярных інтересів. Про тоты вшыткы подіі найвеце знал повісти бл. п. Богдан Ґамбаль (1965-2020), єден з представників прямого поколіня по такых діячах як Стефановскій. Він же, піднимаючы стараня за зворот Бурсы, так направду перенял в даякій мірі стараня Стефановского. На жаль, його уж тіж ніт медже нами.

Споминовым, дакус може долгым вступом прошу вас на днешню премєрову авдицию «Говорить Пряшів». Што нам несут пряшівскы братя? Дознаме ся ввечер. Ім же желаме спокійных, радістных і головно здоровых Великодніх Свят. Більша част пряшівскых Русинів праздник праздників святкувала буде уж в тоту неділю. Христос Воскрес! О місяц мы запрашаме до нашого лемківского стола.