«Говорить Пряшів» – пятниця, 18.10 год.

Витаме вас зас і зас – з пятничком. Початок вікенду то добрый момент на тото, жебы вечером сісти при облюбленым радию і послухати пару слів прямо з Пряшова.

Днес буде оповіданя о двох братях, родаках з Ольшавиці, котры стали мукачівскыма єпископами – Симеон Штефа і Михаіл Мануіл Ольшавскы.

Дальше в «Книжници.фм» – вершы Стефаніі Трохановской, нашой лемківской поетесы, заслуженой діячкы культуры.

Стефанія Трохановска вродила ся 26. червця/юнія 1951 р. на чужыні в Мірошевіцах поблиз Любіна. По вінчаню з Ярославом Трохановскым вернули на рідну Лемковину, до села Білянка. То ту в 1969 р. єй мужом Ярославом Трохановскым покликаный был Репрезентацийный Ансамбль Лемків в Польщы «Лемковина». Через ціле своє жытя анґажує ся в діяльніст ансамблю. Любов до рідной землі Стефанія Трохановска часто выражат в короткых, але як же глубокых текстовых формах.

«Перличка» – ґазета «Недѣля» нам пише о бідным Русинови.

«Припоминка» – припомянеме собі Медженародный Ден Материньского Языка – важный ден для нас вшыткых – Лемків.