«Говорить Пряшів» – пятниця, 18.10 год.

В Рускій Бурсі днескы вечеряме. Може будете вєдно з нами колядувати? І тоты, што уж святкували, а і тоты, што аж о тыжден сядут до святой велиі.

Як то часто быват – любиме сой поспівати. В передріздвяным пості добрі поспівати коляды, з тыма, котрых любиме, шануєме, котры нам сут родином і камаратями. Так днес Терочка Вам заспіват. А пак буде смакуваня того, што сме зрыхтували.

А кєд так бы сте были домю – то залучайте радийо. В днешнім проґрамі повіме собі о писательці Меляніі Германовій. В Книжници.фм будут вершы Мариі Попович, підкарпатской писателькы.

Перличка – ту як раз дальша стріча з темом з ґазеты «Недѣля». Прозрадят нам, якій плян роботы має нове Общество Грекокатолицкых Русиньскых Студентів з Підкарпатя в Дебрецині.

Наконец собі припомнеме што-небуд. Днес о тым, што то є вифлеємскій оген і одкаль взяла ся традиция розношыня го по храмах на Рождество.