«Говорить Пряшів» – пятниця, 18.10 год.

Осін уж як суцо. Жолтен – місяц міцно осінній, пришол ґу нам несподівано. Но, а бодай ґу тым, якы кус в хмарках жыют, якым за скоро тото жытя проходит. І я ся хыбаль до тых, што ім за скоро жене, рахую. Зато так тото чую.

Но, то кєд пришла ґу нам пятничка, так зыйдме ся зас коло радия. Вечером, як уж сонце зайде за горы. В днешній передачы почуєме о вызначным сучасным науковцю і русиньскым писателю з Підкарпатской Руси, Володимірі Рошко.

Дальше, в «Книжници.фм» буде тым разом міцно лемківско. Перенесеме ся до світа Ярослава Зволіньского, уродженця Фльоринкы і пак єдного з основателів першой повыселенчой лемківской орґанізациі в Польщы – Стоваришыня Лемків. Пряшівскы редакторы прочытают стихы зо збіркы «Знакы часу», яку наш родак печатал перед роками.

«Перличка» – принесе нам выімкы з ґазеты «Недѣля», де нам припомянут, жебы сме ся не сердили, а любили і інчы народы, інчы языкы. Просто, жебы сме были одкрыты на інчых люди, а не заперали ся в своій загорідці.

На конец буде і «Припоминка». Зачал ся жолтен, а в минулости был то місяц, коли кінчыли ся боі і складала ся зброя. Як же актуальне, майме надію, же ся зъістит.