«Голосы Русинів Підкарпатя» – середа, 18.10 год.

Про хоцькотрого чоловіка выбратя професії є барз важне. Не каждый має серенчу робити цілый жывот то, што му до душі, што ся любить.

У тім змыслі днешньому геройови проґраму «Голосы Русинів Підкарпатя» Миколови Георгійовічови Поцкови пощастило ся, бо вже як му было 11 років уйко його – учітель, подаровав му фотоапарат і записав го до себе на аматерьськый фотоґрафічный кружок. І перша його знимка «Тютка з коровов» стала посліднім арґументом до выбвратя шпеціалізації.

На днесь Микола Георгійович – ходяча леґенда. Веце як 80 раз його роботы представлены в междінародных салонах, в 21 державах, на 3-ох контінентах світа. Золотый переможця трьох выстав, сріберный – єдной і бронзовый – єдной.

Його знає вшытка Свалява, а такой вшыткы села днешньой Поляньской, Свалявской, Неліпиньской і Керецькувской Теріторіалной громады, і называють го лем «дядя Коля».

Правда, іщі кажуть, же є дядя Коля істинным фотолітописцьом або фотокроніков свого міста. Знав він зобрати, сістематізовати і всокотити унікатны фотоґрафії Свалявы, а такой унікатны відео записы того старого місточка. За што і став почестным гражданом міста.

Благый и тихый дядя Коля – Микола Георгійовіч Поцко, є членом Націоналного общества фотохудожників Україны (НСФХУ), членом Меджінародной федерації умелецькых фотоґрафів (AFIAP), быв делеґатом ХVІ. і ХVІІ. Світового конґреса Русинів. І то далеко не вшытко. Давайте, послухайме його.

Слухайте «Голосы Русинів Підкарпатя» в середу 30-го октобра 2024 р. о 18.10 год., або повторіня в четверь 31-го октобра о 4.30 год. і в суботу 2-го новембра р. о 11.00 год. за русиньскым часом.