«Голосы Русинів Підкарпатя» – середа, 18.10 год.

Днесь побiсідуєме з карпаторусиньскым патріотом і актівістом, участником войны в Афґаністані, головов Общества ветеранів воєн, головов Федерації єдиноборств «Хортинг», членом Русиньского културолоґічного клуба Михаілом Куцкіром.

Мішко у свої 57 років перейшов вже інтересну, повну авантур і небезпекы жывотну путь, котрой было бы доста на жывоты дакілко людей.

Народив ся у Сваляві, а жыв у Голубинім, де му дідо, твердый прихыльник партії Штефана Фенцика часiв Чехословакії i «другых мадяр» співав русиньску гімну до смерти, сідаючі фрыштиковати ці обідовати.

Вчів ся в Рязани (Росія), войсковуу службу мав у Афґаністані, а по армії возглавив ветераньску орґанізацію, котров керує вже двадцять років. За Афґаньску войну Мішко не розказує майже нич, хоць мав за ню іщі з далекого 1986-го року медайлу «За бойовы заслугы», а у 2014-ім році нашов го іщі орден «За заслугы» 3-го ступеня.

Окрім того орден «За розбудову Україны», орден «Нихто окрім нас», мадайла Богдана Хмельницького – і то не вшытко.

Як бывшый шпортовець Куцкір тренерує молодых Ужгородців. При тім паралелно прививавучі їм не лем техніку і навыкы ся бити, а і любов до вшыткого свого: історії, сохташа, языка. І так бісіда з Карпаторусином з великым минулым за плечіма Михаілом Куцкіром.

Слухайте «Голосы Русинів Підкарпатя» в середу 7-го авґуста 2024 р. о 18.10 год., або повторіня в четверь 8-го авґуста о 4.30 год. і в суботу 10-го авґуста 2023 р. о 11.00 год. за русиньскым часом.