«Голосы Русинів Підкарпатя» – середа, 18.10 год.

Днесь маєме бiсіду з Васильом Січом, в. о. головы Виноградiвского общества iмeни Александра Духновіча. Хоць Виноградівскый район днесь не екзістує, він соєдиненый як і другы до Береговского. Але організація виноградівска є. Она фунгує, і є єдна з ліпшых на Підкарпатю.

Василь Січ народив ся у простій родині у селі Онок. Мама му была простов учітельков, а нянько – простым колхозником. Народив ся 22-го октобра 1967-го року і быв четвертов дітинов у родині. У Оноку він і жыє цілый свій жывот, хоць фортуна і давала му шансу выбрати другу локацію про жытя, но малу Отцюзнину не мінять Василь на нич.

Онок фурт быв русинськым селом, хоць до Другой світовой войны ту бывали і Жыды і Циґаны. Жыды, што пережыли депортацію, по войні ся забрали до Ізраіля і Америкы, а у Циґанів на днесь у Оноку – ціла уліця.

Головно Ромове у совітьскый час, коли Русины самы бояли ся свого імени, называли їх Руснаками. А Жыды, што приходять у гості, тямлять русиньску бісіду іщі ліпще як тоты, котры ту жыють. Їх не заділа асімілація. Бісіда, котров они говорять, є старов, автентічнов, і она прекрасно радує вуха Василя і вшыткых Оносців.

Василь Січ прожыв префайноє жытя з женов – Волинянков, має трьох дівок и пятеро внуків, любить свою землю, людей, котры на ній жыють, і співать нашы співанкы, радуючі близкых, сусідів, вшыткых Севлюшців і Русинів світа. Зато з ним і будеме днесь бісідовати.

Слухайте «Голосы Русинів Підкарпатя» в середу 24-го юла 2024 р. о 18.10 год., або повторіня в четверь 25-го юла о 4.30 год. і в суботу 27-го юла 2023 р. о 11.00 год. за русиньскым часом.