«Голосы Русинів Підкарпатя» – середа, 18.10 год.

Днесь на антені будеме высылати інтервю з нашов бітанґов, нашов босорканьов — Алінов Паш, котра позната у світі як етно-фолк реперка і гіп-гоперка з Підкарпатя.

А побісідуєме повно і много о карпатьскій автентічній културі, котра є жрідлом морално-духовного і естетічного збогачіня в їй жывоті – як в професіоналнім, так і в особнім. Окрім того артістка поділить ся із творчіма планами до будучности.

“Я дуже горжу ся своїм карпатьскым коріням, котрой мене надыхає, дає мені тоты переливы у музиці особливы, мелодії і мелодікы.”

Інтервю было записано нажыво почас 17-го еко-пікніка CHYSTO.DE / ЧИСТО.ДЕ на березі Карпатьского моря, Вільшаньскый водный резервоар, у селі Колочава.

Ключовы темы інтервю:

• Карпатьскый реп як новый музичный жанер
• Ламаня стереотіпів у творчости Аліны Паш
• Артіста рівнать ся інфлуенсер

Аліна Іванівна Паш народила ся 6-го мая 1993-го року у селі Буштино, што на Тячівщіні, Підкарпатя. Отець робив міліціонаря, а мама была музичным педаґоґом і хореоґрафом.

І якраз мама розвивала у юной Аліны інтерес о музику, записовала на казеты вшелияку популарну загранічну музику і давала слухати. “Памятам, раз мы слухали Prodigy, та сусідове думали, што мы діяволів ізганяєме,” з усмішком на твари споминать респондентка.

А як пішла до школы, та іщі бівше ся актівізовала в музичній сфері. Паралелно з основным навчаньом і умелецьков школов у селі Буштино ходила шпеціално до Ужгорода на пріватны годины співу. Од тінейджерьскых років брала участь на всеукраїньскых і меджінародных співацькых фестівалах, такых як Різдвяна зірочка, Буковинська зірочка, Children’s Eurostar, Веселка над Тисою і многых другых. А в 11-ій класі была у музичній телевізній шоу талентів Караоке на майдані.

На высокошкольскы штудії пішла на Київску муніціпалну академію естрадного і ціркусового кумшту імени Леоніда Утьосова, котру успішно закінчіла і здобыла ступінь маґістер (рр. 2012 – 2017).

Свою карьєру Аліна Паш зачінала з діджейскых сетів і cover ґруп, так само робила супроводну вокалістку про поп-звізды. У 2015-ім році стала фіналістков україньской верзії Ікс-Фактор, де здобыла третє місце.

Переломным моментом у творчости став апріль 2018-го року – презентація дебутового сінґла Bitanga і відеа до той співанкы. Композіція, котра соєдинять в собі гіп-гоп, русиньскый язык, елементы pop music і карпатьскы етно мотівы, полюбила ся слухачам і з того моменту Аліна Паш веде актівну солову карьєру. Десяткы релізів, выступліня на Україні і далеко за їй граніцями, сполупраца з артістами світового рівня.

Вызначнов про себе подійов як творчой особы Аліна означує участь на Ході достойности до Дня незалежности Україны у 2019-ім році, де чітала авторьскый куплет репу помеджі гімны.

В януарі 2022-го року здобыла меджінародну премію Music Moves Europe Awards 2022 про молодых артістів, котры презентують сучасне та будуче звучаня Европы.

“Силный візуал, силный продакшн. Досправды інтересна і унікатна артістка. Точно мож такой повісти, якы цінности она боронить,” коментовала журі перемогу Аліны Паш.

А у фебруарі того самого року стала переможкыньов Народного выберу Україны на Евровізію 2022 з композіційов Shadows of Forgotten Ancestors (по русиньскы Тіні забытых предків).

В періоді од 24-го фебруара 2022-го року Аліна Паш продовжує творчу роботу на добровольницькых прінціпах, а так само выдає композіції на підтримку Україны: Heaven, Небратські народи. А на тоту пятніцю, 11-го новембра, оголошена премєра їй новой композіції з відеокліпом під назвов Вірити.

Слухайте «Голосы Русинів Підкарпатя» в середу 9-го новембра 2022 р. о 18.10 год., або повторіня в четверь 10-го новембра а о 4.30 год. і в суботу 12-го новембра 2022 р. о 11.00 год. за русиньскым часом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА