«Голосы Русинів Підкарпатя» – середа, 18.10 год.

Днесь в нашім выданю представиме вам другу часть інтервю з русиньскым філолоґом-славістом і краєзнательом із Підкарпатя Димитрійом Попом. Побісідуєме детайлніше о його научно-публіцістічній діятельности.

Ключовы темы інтервю:

• Сучастна русиньска літературна общіна Підкарпатя
• Шпеціфікы русиньского языкового вопросу з погляду Димитрія Попа
• О выбраных публікаціях науковця Димитрія Попа

Димитрій Івановіч Поп народив ся 16-го апріля 1941-го року як найменшый сын у многодітній родині в селі Страбічово близко Мукачова на Підкарпатю. Хоць родічі были простыма робочіма, своїх трьох хлопців выучіли і дали їм высшу освіту.

“Отець тягнув ся до наукы, но бабі треба было робочі рукы і не пустила го ся учіти. Того дуже хотів, абы мы не робили так тяжко як він і зробив вшытко, абы сьме учены были.”

Середню освіту здобыв в роднім селі, наслідно закінчів Мукачовскый кооператівный технікум (рр. 1955 – 1958). На высокошкольскы штудії пішов на одділіня чеського языка і літературы філолоґічной факулты Ленінґрадьской універзіты (рр. 1963 – 1968). Довгы рокы быв лектором на чеській катедрі Ужгородьской універзіты.

До русинства пришов кінцьом 1990-тых років дякуючі братови Іванови Попови (вызначный русиньскый історік і науковець), і так почав ся актівно анґажовати в културно-просвітницькім русі на Підкарпатю. Брав участь в прорусиньскій пропаґації почас вседержавного списованя на Україні в році 2001. Так само сполупрацовав над проєктом Русиньскых народных (недільных) школ на Підкарпатю, котры орґанізовав русиньскый меценат з Канады Штефан Чепа.

В роках 2000 аж 2003 Димитрій Поп быв председом Крайового общества підкарпатьскых Русинів. Послідні двадцять років замірює ся на розвиток русиньской наукы, головный фокус направленый на історію і лінґвістіку, про што свідчать його публікації. В сучасности веде Русиньскоє научно-освітньоє общество.

Є сполуавтором (вєдно з Михаілом Алмашійом і Димитрійом Сидиром) триязычного русиньско-україньско-російского словника на 25 тіс. слов (р. 2007), і автором першого русиньского сінонімічного словника на 5 тіс. слов (р. 2001). В даный час приправлює русиньскый орфоґрафічный словник.

Слухайте «Голосы Русинів Підкарпатя» в середу 21-го септембра 2022 р. о 18.10 год., або повторіня в четверь 22-го септембра о 4.30 год. і в суботу 24-го септембра 2022 р. о 11.00 год. за русиньскым часом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА