«Голосы Русинів Підкарпатя» – середа, 18.10 год.

Днесь в нашім выданю представиме вам третю і вже остатню часть інтервю з вызначным русиньскым поетом із Підкарпатя Володиміром Рошком, так само знамым в краї за свойов професійов як зоолоґ, ентомолоґ, еколоґ.

Перу Володиміра Рошка належать два поетічны зборникы. Автор нам ся признав, же має вже написаных віршів доблуду, і указав, як має їх красно уложены на компютері.

„Та што з того,“ розводить плечами, „жадного фінанцованя не є, і як тут мож дашто выдавати. А шкода, дуже шкода.“

Про се і много далшых інтересных нюансів односно творчости поета мы якраз і будеме бесідувати. І спеціално про радіо лем.фм Володимір Рошко выбрав дакілько неопублікованых стихів на декламацію.

Ключовы темы інтервю:

• Хоснованя русиньского языка в поетічнім писаню
• Розвой русиньской літературы на Підкарпатю в сучасности
• Процес написаня віршів і выданя зборника зо скушености Володиміра Рошка

Володимір Гавриловіч Рошко народив ся 19-го юла 1957-го року в селі Калник близко Мукачова на Підкарпатю. Родічі были інтеліґентами: отець – біолоґ, мама – філолоґ україньского языка.

До передшкольского віку выростав з бабков і дідком на селі. Каже, же русинство привили йому якраз они. Так ся родічі перебрали до Ужгорода за роботов, де свого дітвака і дали до школы. Іщі з дітинства юного Володиміра пробовали по різному реалізовати. Раз то была гра на гуслях, ходив рік з половинов до музичной школы. Дале была намного успішніша перспектіва – плаваня.

„Айбо, як прийшов час уберати вадь спорт, вадь высокошкольскы штудії, та нянько з мамков повіли, же учіти ся є ліпшоє,“ споминать респондент.

В році 1979 закінчів Біолоґічну факулту на Ужгородьскій державній універзіті, дістав діплом біолоґа-хеміка. Наслідно за професійов робив на тій універзіті, наперед як лаборант Катедры ентомолоґії, єдній з лем трьох подобных на Україні, пак быв фаховый асістент, доцент. Од 1992-го року доднесь є ведучім катедры, де одробив 40 років.

Кандідат біолоґічных наук, доцент, оціненый нагородов Відмінник освіти України. А у 2013-ім році наряджіньом втогдышнього презідента Україны Віктора Януковіча Володимір Рошко быв удостоєный орденом За заслуги ІІІ. ступня За вагомий особистий внесок у розвиток вітчизняної науки, зміцнення науково-технічного потенціалу України, багаторічну сумлінну працю, високий професіоналізм та з нагоди Дня науки.

Автор чісленых одборных научных публікацій з вопросів досліджованя біолоґічной розмаїтости і еколоґічных проблем.

Цілый свій жывот присвятив науці, але паралелно з плоднов научнов і педаґоґічнов діялностьов все бік по боці ішла творчость, даколи бівше або менше серьйозна. Іщі од малого знав зліпити пару шориків веселых поетічных, жебы забавити цімборів. Вже у зрілім віці зачав писати нелем короткы фіґлі, але і стихы по русинськы із силнішым смысловым наповніньом, в котрых ся піднимають остры актуалны вопросы про Русинів.

„Днешнім часом, коли такый доста інтересный світ, я бы хотів, абы нашы Руснакы порозуміли, што треба встати з колін, вадь із сна, і указати ся, хто мы є, што мы файный малый народ у Європі.“

Выдав два поетічны зборникы: Я дуркаву у ваші двирі (р. 2015) і двоязычна робота Вірши руснаків (р. 2020), котра написана по русиньскы і по румуньскы. Є лавреатом Премії Івана Петровція од Крайового общества підкарпатьскых Русинів. Стихы поета были опублікованы і в Алманахах днешньої русинської літературы.

Слухайте «Голосы Русинів Підкарпатя» в середу 8-го децембра 2021 р. о 18.10 год., або повторіня в суботу 11-го децембра 2021 р. о 11.00 год. за русиньскым часом.

Автор фотоґрафії: Микола Поцко.