«Голосы Русинів Підкарпатя» – середа, 18.10 год.

В днешнім выданю представиме інтервю з русиньскым поетом і блоґером з Підкарпатя Віктором Черкуном, в котрім поговориме о його нововыданім двоязычнім зборнику стихів під назвов Нариси навіяні дорогою.

Ключовы темы інтервю:

• Жывотна путь Віктора Черкуна
• Шпеціфікы творчости поета
• Унікатность русиньского языка на Підкарпатю з погляду Віктора Черкуна

Віктор Петровіч Черкун народив ся 30-го юна 1976-го року як старшый сын у многодітній родині у селі Сасова, што на Виноградівщіні, Підкарпатя. Отець быв інжінір-строїтель, а мама робила у фабриці на выробу керамікы.

Закінчів вісем клас в роднім селі, а далше пішов вчіти ся до Мукачова на технікум за фахом аґроном-плодоовочівник. Наслідно у роках 1995-1997 служыв у войску.

Од року 2004 робить як шофер на меджінародных трасах. До того шоферовав по Україні, навщівив майже кажду область державы окрім Сумской і Автономной републікы Крим (із слов респондента).

Путуючі по незнамых краях будучому поетови ся привив інтерес до языків і култур різных народів. «І лем коли-м ся становив як зрілый чоловік, єм поняв істину і зачав ужывати такі понятя як русиньскый народ і русиньска бісіда», так коментує появу русинства в свому жывоті Віктор.

Писати почав на зачатку весны 2017-го року. Кедьже Віктор Черкун є актівным хосновательом соціалной сіті Facebook, першы свої творы публіковав у зборниках забавляючіх локалпатріотічных ґруп Підкарпатя КАвІлЮєМ & FigLюєм і Креденц Сміху. Послідні три рокы веде на своїй сторінці на сіті Facebook языкову рубріку #ДУЮСПІКГОВОРИТЬЗАКАРПАТТЯ.

Важно підчаркнути, же творчость Віктора Черкуна представлена є і по русиньскы, і по україньскы, причім бівшу їй часть творять стихы по українськы. Є автором двоязычного зборника Вірші Закарпатьского Далекобійника. А 20-го юна 2021-го року быв презентованый його другый двоязычный зборник Нариси навіяні дорогою.

Слухайте «Голосы Русинів Підкарпатя» в середу 1-го септембра 2021 р. о 18.10 год., або повторіня в суботу 4-го септембра 2021 р. о 11.00 год. за русиньскым часом.